Disa shtete amerikane padisin TikTokun për “shkatërrim” të shëndetit mendor të adoleshentëve

Disa shtete në Shtetet e Bashkuara të Amerikës kanë paditur TikTokun, duke akuzuar platformën e rrjeteve sociale se ndihmon në nxitje e krizës së shëndetit mendor tek adoleshentët, shkruan BBC.

Një grup prej 14 avokatësh të përgjithshëm nga i gjithë vendi pretendon se kompania përdor veçori të varësisë për të lidhur fëmijët me aplikacionin dhe se ka mashtruar qëllimisht publikun në lidhje me përditësimin e sigurisë.

TikToku e quajti padinë “zhgënjyese” dhe besonte se shumë nga pretendimet ishin “të pasakta dhe mashtruese”.

Platforma është duke punuar ta kthejë prapë ligjin e miratuar në Kongres në prill që do ta ndalonte përdorimin e saj në SHBA, përveçse kompania mëmë kineze Bytedance bie dakord për t’i shitur aksionet.

“TikToku e di se përdorimi i detyrueshëm dhe efektet e tjera të dëmshme të platformës së tij po shkaktojnë kërdi në shëndetin mendor të miliona fëmijëve dhe adoleshentëve amerikanë”, thuhet në padinë e ngritur në New York të martën.

“Megjithë njohuritë e tilla të dokumentuara, TikToku vazhdimisht e keqinterpreton platformën si të sigurt dhe të përshtatshëm për fëmijët dhe adoleshentët”, thuhet tutje në padi.

Prokurorja e Përgjithshme e New Yorkut, Letitia James, ka thënë se të rinjtë në të gjithë vendin po vdesin apo po lëndohen duke bërë “sfidat” e TikTokut dhe shumë të tjerë po ndihen “më të trishtuar, të shqetësuar dhe të dëshpëruar për shkak të veçorive të varësisë së TikTokut”.