Dy raste të vdekjes në Shkup: Gjendet e pajetë një 80-vjeçare, ndërron jetë edhe një fëmijë trevjeçar
Dy raste të vdekjes janë raportuar më 21 nëntor në Shkup, njëri në Kisella Vodë dhe tjetri në Kompleksin e Klinikave „Nënë Tereza“.
Sipas njoftimit të policisë, në orën 14:05, SPB Shkup është njoftuar se në shtëpinë e saj, në zonën e Kisella Vodës, ishte gjetur e pajetë S.T.N. (80).
Mjeku i Ndihmës së Shpejtë Mjekësore ka konstatuar vdekjen, ndërsa në vendin e ngjarjes është kryer këqyrja. Me udhëzim të prokurorit publik, trupi i së ndjerës është dërguar për obduksion.
Në rastin e dytë, rreth orës 13:40, nga Kompleksi i Klinikave „Nënë Tereza“ është raportuar se në spital ishte sjellë i pajetë një fëmijë trevjeçar nga Gjevgjelia.
Sipas informacioneve policore, fëmija kishte pasur probleme shëndetësore dhe kishte ndërruar jetë gjatë rrugës për në spital.
Në vendin e ngjarjes kanë dalë nëpunës policorë nga SPB Shkup, ndërsa me udhëzim të prokurorit publik, trupi i fëmijës i është dorëzuar familjes.
Për të dyja rastet janë ndërmarrë veprimet përkatëse nga institucionet kompetente.
Flaka















