Edhe 7 vendvotime të paprocesuara, asnjë ndryshim në faqen e KQZ-së nga 12 shkurti

Ende edhe 7 vendvotime kanë mbetur të paprocesura për të përfunduar procesi i numërimit të votave të rregullta për zgjedhjet e 9 shkurtit.

Në faqen e KQZ-së përditësimi i fundit është bërë më 12 shkurt rreth orës 22:00.

Nga 2533 vendvotime, deri të mërkurën në orën 22:12 janë procesuar 2526 ose 99.72 për qind.
Nga procesimi i 2526 vendvotimeve, Lëvizja Vetëvendosje ka 40.84 për qind të votave, apo 341 mijë e 672 vota. Partia Demokratike e Kosovës ka marrë 184 mijë e 499 vota apo 22.05 për qind. Lidhja Demokratike e Kosovës mbetet e treta me 17.67 për qind apo 147 mijë e 827 vota. Koalicioni AAK-Nisma, konservatorët dhe intelektualët ka marrë 62 mijë e 309 vota apo 7.45 për qind, si subjekti i fundit që ka siguruar kalimin e pragut prej 5 për qind. Lista Serbe ka marrë 38 mijë e 83 vota ose 4.55 për qind. Ndërsa Koalicioni për Familje ka marr 2.26 për qind ose 18 mijë e 905 vota.

Të enjten KQZ-ja ka njoftuar se procesi i numërimit të votave të kandidatëve për deputetë ka nisur në qendrat komunale të numërimit në Suharekë, Ferizaj, Vushtrri, Kaçanik, Novobërdë, Prizren, Shtime dhe Junik.

KQZ-ja ka njoftuar se numërimi po bëhet në 26 qendra komunale.

Uebfaqja e KQZ-së që nga nisja e numërimit ka pasur probleme në shfaqjen e numrave. Në mbrëmjen e 9 shkurtit, KQZ-ja njoftoi se të dhënat nuk duhet të merren parasysh për shkak të telasheve me faqen. Në mëngjesin e së hënës, KQZ-ja tha se kjo çështje është rregulluar.