Fatkeqësia në Koçan ‘zgjoi’ institucionet

Zjarri i madh që ndodhi më 16 mars në diskotekën “Puls” në Koçan, ku humbën jetën 60 persona, ka ngritur në këmbë institucionet, shkruan Alsat.

Për katër muaj, nga 1 nëntori deri më 28 shkurt, inspektorët në të gjithë vendin kanë kryer 769 kontrolle, për të cilat janë shqiptuar 81 gjoba në vlerë prej mbi 80 mijë euro.

“Pas 16 marsit institucionet u ngritën në këmbë. U deshën gati 60 njerëz të vdisnin që institucionet të kontrollonin se ku lejohet pirja e duhanit në ambiente të mbyllura dhe sa respektohet ligji. Këto ditë ka disa kontrolle të intensifikuara, por shkelësit marrin vetëm gjoba”, raporton gazetari i Alsat, Angell Dimovski.

Nga Inspektorati shtetëror i tregut për TV Alsat thonë se për katër muaj, nga 1 nëntori deri më 28 shkurt, inspektorët në të gjithë vendin kanë kryer 769 kontrolle, për të cilat kanë shqiptuar 81 gjoba në vlerë prej mbi 80 mijë euro.

“Gjobë në shumë prej 2000 deri në 4500 euro në kundërvlerë në denarë për personin juridik dhe gjobë në shumë prej 500 deri në 1000 euro në kundërvlerë në denarë për personin përgjegjës në personin juridik”, thonw nga ISHT.

Sipas Ligjit për mbrojtjen nga duhani ndalohet pirja e duhanit në shkolla, kopshte, objekte për qëndrim, institucione shëndetësore, palestra, ambiente ku prodhohet, përgatitet, shërbehet, shitet ose konsumohet ushqimi si dhe në internet-kafe.

Ndalohet pirja e duhanit edhe në kafene, klube nate, kabare, disko- klube, bare dhe ambiente të tjera të brendshme.

Pirja e duhanit lejohet vetëm jashtë objektit afarist, tarracë, kopsht veror etj., vetëm nëse hapësira është e hapur nga të paktën tre anët.