Fillon provimi i maturës shtetërore, sanksione për ata që do të tentojnë të manipulojnë

Këtë vit, nxënësit e shkollave “Marija Kiri Skllodovska” dhe “Dimitar Vllahov” po japin provimin e maturës shtetërore në ambientet e Fakultetit të Bujqësisë në UKIM. E njëjta gjë vlen edhe për shkollat e tjera, të cilat nuk kanë hapësira të mjaftueshme.

Pikërisht këtu erdhi Ministrja e Arsimit dhe Shkencës, Vesna Janevska. Para fillimit të provimit, ajo u uroi maturantëve suksese dhe deklaroi para kamerave se shpreson që këtë vit të ketë më pak mashtrime.

“Këtë vit pres që gjithçka të shkojë pa probleme, me më pak veprime të padëshiruara, pra mashtrime, siç ka ndodhur në të kaluarën. I bëj thirrje profesorëve dhe vëzhguesve që ta bëjnë punën e tyre me përgjegjësi. Theksoj se rregulloret ligjore janë forcuar dhe nuk pres që askush të marrë rreziqe për t’u përballur me ndonjë sanksion”, tha Vesna Janevska, ministre e Arsimit dhe Shkencës.

Çfarë sanksione do të ketë për ata që do të mashtrojnë në provim?
“Gjëja më e keqe është se ai do të përjashtohet nga provimi, dhe unë nuk pres që personi që ka mashtruar ta dijë fare. Ai me shumë gjasa do të humbasë të gjithë vitin shkollor, deri në provimin e ardhshëm të maturës, që do të thotë se ka humbur një vit të jetës së tij për të hyrë në tregun e punës ose për të shkuar në fakultet”, shtoi Janevska.

Rezultatet do të shpallen jo më vonë se një muaj pas provimit të dytë ekstern, pra rreth datës së 10 korrikut. Rreth 15000 maturantë i nënshtrohen provimit të maturës shtetërore, dhe procesi monitorohet nga rreth 2000 testues.
“Të gjithë profesorë që kanë rolin e testuesit, maksimalisht me përgjegjësi ta bëjnë punën e tyre sepse roli i tyre është kyç në këtë punë. Andaj nuk jemi vetëm ne, këtu është i gjithë sistem arsimor, duke nisur nga Qendra shtetërore e provimeve, MASH, Byroja për zhvillim të arsimit dhe institucionet e tjera arsimore”, tha Daniella Jovçevska Mihajllovska, Qendra Shtetërore e Provimit.
Matura shtetërore në sistemin tonë të arsimit u vendos në 2017, në sesionin e provimeve në qershor dhe gusht. Hera e vetme kur nuk u organizua ishte në fund të vitit shkollor 2019/2020 për shkak të pandemisë Kovid.

Me ndryshimet e miratuara të Ligjit për arsim të mesëm, nga viti i ardhshëm shkollor do të zbatohet një koncept të ri të maturës shtetërore i cili parasheh provim të veçantë për maturën shtetërore në shkollat profesionale, gjimnazet dhe në shkollat e artit.