Gashi dhe Qoku kërkojnë që hapësira rreth Kuvendit të shpallet zonë sigurie!

Kryetari i Kuvendit, Afrim Gashi, së bashku me deputetin Bekim Qoku nga “VLEN”, kanë propozuar një ligj të ri që synon shpalljen e zonës përreth ndërtesës së Kuvendit si zonë sigurie. Propozimi po shqyrtohet me procedurë të shkurtuar dhe gëzon mbështetjen e gjerë ndërpartiake në Kuvend.

Projektligji është nënshkruar edhe nga përfaqësues të grupeve parlamentare të LSDM-së, VMRO-DPMNE-së, BDI-së dhe Levicës – konkretisht nga Blerim Bexheti, Borislav Krmov, Vesna Bendevska, Nikola Micevski dhe Oliver Spasovski.

Ky hap shihet si një përgjigje institucionale ndaj rastit të njohur të garazhit shumëkatësh, i cili ishte planifikuar të ndërtohej në oborrin e Kuvendit, pas një shitjeje të tokës shtetërore në ankand në vitin 2014 dhe dhënies së lejeve për ndërtim nga autoritetet komunale.

Sipas projektligjit, parashikohet:

• Shpallja e zonës përreth Kuvendit si zonë sigurie;
• Anulimi i të gjitha lejeve të ndërtimit në këtë zonë që janë miratuar para hyrjes në fuqi të ligjit;
• Ndërprerja e kontratave ekzistuese që lidhen me pronat në zonën e re të sigurisë.

Nëse miratohet, ligji do të bllokojë përfundimisht çdo përpjekje për ndërtim privat në afërsi të ndërtesës së Kuvendit, duke forcuar kontrollin institucional mbi hapësirën përreth një objekti të rëndësisë së veçantë shtetërore.