Gratë në RMV përfshihen më pak në krime – Të nën-përfaqësuara në sistemin e drejtësisë

Gratë në Maqedoninë e Veriut janë shumë herë më pak të përfshira në vepra penale sesa burrat, por sërish mbeten më pak të përfaqësuara në sistemin e drejtësisë penale. Këtë e tregojnë të dhënat më të fundit nga Enti Shtetëror i Statistikave.

Sipas të dhënave për vitin 2023, 91% e personave të dënuar për vepra penale ishin burra, ndërsa vetëm 9% gra. Këto statistika ngrenë pyetje për pabarazitë strukturore në sistemin e drejtësisë dhe përfaqësimin gjinor në institucione.

Drejtori i Entit të Statistikave, Dejan Stankov, thekson se statistikat gjinore janë thelbësore për marrjen e vendimeve që promovojnë barazinë.

“Njëkohësisht ato shfrytëzohen për matjen e efikasitetit të politikave kombëtare dhe të tjerave në domenin e barazisë gjinore”, tha Stankov.

Përkundër faktit se në universitete regjistrohen më shumë vajza sesa djem, gratë vazhdojnë të jenë më pak të përfaqësuara në tregun e punës, si dhe në institucionet vendimmarrëse.

Përfaqësuesja e UNDP-së, Vesna Ivanoviq, e ilustroi situatën me një metaforë domethënëse:

“Një shoqëri mund të arrijë përparim vetëm nëse si një zog fluturon me të dy krahët – njëri janë gratë dhe tjetri burrat. Nëse krahu i grave është i thyer ose i shfrytëzuar pjesërisht, zogu do të fluturojë vetëm me një krah.”

Presidentja e vendit, Gordana Siljanovska Davkova, e cila është edhe gruaja e parë që mban këtë funksion, theksoi rëndësinë e përshpejtimit të procesit të mbledhjes dhe përdorimit të të dhënave gjinore për të adresuar problemet urgjente.

“Nëse duam të krijojmë zgjidhje të përshtatshme për çdo sfidë dhe problem që prek grupe të ndryshme shoqërore ndryshe, nëse duam të eliminojmë diskriminimin, atëherë duhet të kemi të dhëna të sakta, të përditësuara dhe të përdorura në mënyrë efikase.”

Këto deklarata u bënë me rastin e 25-vjetorit të mbledhjes së të dhënave gjinore në Maqedoninë e Veriut.

Sipas Regjistrimit të vitit 2021, për herë të parë në histori, gratë përbëjnë shumicën në popullsinë e përgjithshme të vendit me 50.4%, krahasuar me burrat që përbëjnë 49.6%.