Ish-ambasadori Çejku: Më të persekutuarit në Maqedoninë e Veriut janë ortodoksët shqiptarë

Ish-ambasadori i Shqipërisë në Maqedoninë e Veriut, Arben Çejku thotë se më të persekutuarit në Maqedoninë e Veriut janë ortodoksët shqiptarë, përcjell TV21. Çejku këto deklarata i dha në emisionin “Një Shqipëri” në Radio Televizioni Shqiptar (RTSH).

“Në qoftë se flasim, ndërtojmë një piramidë të persekucionit, më të persekutuarit në Maqedoninë e Veriut janë ortodoksët shqiptarë, pastaj vinin shqiptarët, pastaj vinte Maqedonia në kuadër të ish-Jugosllavisë, Kosova dhe të tjerët me radhë. Pra ka pasur gjithmonë një rend të persekucionit, edhe unë mendoj që kjo duhet parë edhe në këtë drejtim, dmth duke u çliruar nga këto ethet nacionaliste, të vihemi thjesht përballë fakteve”, tha mes tjerash Çejku.

Ish- ambasadori thotë se për këtë, problemi nis në Tiranën zyrtare, shton se shteti shqiptar nuk e ka hapur të të shkuarën.

“Problemi nuk është vetëm te shqiptarët në Maqedoni dhe te shqiptarët ortodoksë në Maqedoni, problemi fillon në Tiranë. Dhe nëse duam ta vëmë gishtin në plagë, duhet ta vëmë tek instituvionet tona shkencore, të cilat nuk kanë bërë studime të mirëfillta që ne të ju ofrojmë element përtej propagandës ditore, përtej përdorimit politik nga një politikan i caktuar, apo një grupim i caktuar, të kuptojmë apo ta vendosim këtë në një plan të një rrafshi, të një diskutimi historik, përballë Enciklopedisë së Maqedonisë, e cila ka qenë problem krejt më vete dhe në një farë mënyrë i turbulloi të gjithë këto lloj ujërash edhe, kam pasur përplasjet e mija për këtë gjë, por lidhur me elementin ortodoks shqiptar, nuk u përfitua të themi nga hapja e këtij debati nga vetë Akademia e Maqedonisë së Veriut”, deklaroi Çejku.