Jusifi nga BDI: Pushteti ua zbulon fytyrën e vërtetë – folni edhe një herë, tu dëgjon Mickoski!

Sekretari i degës së BDI-së në Gostivar, Fidan Jusufi, ka reaguar ashpër ndaj zhvillimeve të fundit politike, sidomos në lidhje me presionet ndaj zyrtarëve shqiptarë për përdorimin e gjuhës shqipe në institucionet publike. Në një deklaratë publike me tone të qarta kritike, Jusufi ka akuzuar qeverinë e re për sjellje arbitrare dhe nënçmuese, transmeton Flaka

“Pushteti të jep shumë privilegje, po t’a merr edhe fytyrën. Disa i tjetërson, disave ua zbulon anën e errët të karakterit që lehtësisht e kamuflojnë para se ta marrin pushtetin!” – shkruan Jusufi në rrjetet sociale.

Duke ironizuar qëndrimet e zëvendëskryeministrit Ivan Stoilkoviç dhe kërcënimet ndaj drejtorit Arsim Idrizi për përdorimin e gjuhës shqipe, ai shton:

“Ndërsa sipas logjikës së Qokut, nëse legjitimitetin për pushtet ta jep legjitimitatori, duhet të kërkosh falje edhe pse e flet gjuhën e nënës – haj folni edhe njëherë, t’u dëgjone Micku.”

Në fund, Jusufi jep një mesazh të drejtpërdrejtë dhe simbolik për qeverinë aktuale:

“Në këtë rast, vetëm një zgjidhje është e duhura, në gjuhën që ata e kuptojnë më mirë: ‘еве ти влада, за државата ќе видиме’?” (Ja qeverinë, për shtetin do të shohim)?.

Deklarata e tij vjen në një kohë kur tensionet etnike dhe çështjet e përfaqësimit po rikthehen fuqishëm në debatin publik, veçanërisht pas zhvillimeve me Ligjin për Përdorimin e Gjuhëve dhe reagimeve të liderëve shqiptarë ndaj qasjes së ekzekutivit të ri. Flaka Media