Kasami me arsyetime banale, kurse institucionet po mbushen me punësime njëetnike!

Bilall Kasami, një nga liderët e koalicionit qeveritar VLEN, deklaroi në një intervistë në Aslat – Maqedoni, se Ligji për përfaqësim të drejtë dhe adekuat është në fazë të avancuar diskutimi brenda partnerëve të qeverisë dhe pritet së shpejti të kalojë në procedurë qeveritare, shkruan Flaka. Sipas tij, vonesa e këtij ligji është shkaktuar pjesërisht nga përplasjet e brendshme në VLEN pas largimit të Arben Taravarit.

“Fatkeqësisht, ky ligj është vonuar edhe për shkak të debatit të brendshëm që kemi pasur si rezultat i largimit të Arben Taravarit. Në vend që sot të kishim ligj, si duket lufta e brendshme në VLEN e ka shtyrë këtë proces. Tani, të çliruar nga ky faktor destruktiv, presim që ligji të dalë para opinionit shumë shpejt”, tha Kasami.

Megjithatë, ky justifikim është vënë në pikëpyetje, sidomos në dritën e deklarimeve të kryeministrit Hristijan Mickoski, i cili ka bërë të ditur se koncepti i ligjit ka qenë gati që në dhjetor të vitit 2024, dhe aktualisht është në fazën e konsultimeve me ekspertë të së drejtës kushtetuese për të shmangur kontestime në Gjykatën Kushtetuese.

Udhëheqës të grupit punues për këtë ligj janë zëvendëskryeministrat nga radhët e VLEN-it, Arben Fetai dhe Izet Mexhiti, të cilët kanë premtuar se projektligji do të garantojë përfaqësim të barabartë të të gjitha komuniteteve në institucionet shtetërore.

Pavarësisht këtyre zotimeve, shqetësimet për diskriminim në punësime vazhdojnë. Aktualisht, nuk ekziston ndonjë mekanizëm juridik që garanton mbrojtjen e komuniteteve jo-maqedonase nga diskriminimi gjatë punësimeve në sektorin publik. Në mungesë të këtij ligji, institucionet vazhdojnë të mbushen me punësime pothuajse ekskluzivisht nga komuniteti maqedonas.

Duket që deklarata e Kasamit synon të kamuflojë përgjegjësinë për vonesat dhe të shmangë presionin publik mbi qeverinë, ndërkohë që qytetarët, sidomos shqiptarët, po përballen me pasojat e mungesës së një kornize të qartë ligjore për barazi dhe përfaqësim.

Gjykata Kushtetuese e RMV-së më 9 tetor 2024 me shumicë votash vendosi për shfuqizimin e instrumentit “Balancues”, i cili deri tani ka rregulluar përfaqësimin e drejtë të komuniteteve në administratën shtetërore. Pas këtij vendimi, për punësimet në administratën publike nuk po mbahet llogari për përkatësinë etnike. Flaka Media