Konflikt për pastrimin në Çair: Komuna pa marrëveshje me deponinë Drisla

Kryetari i Komunës së Çairit, Visar Ganiu, ka akuzuar kuadro të BDI-së që drejtojnë me NP “Higjiena Komunale”, për pengesa të qëllimshme në aksionin për pastrimin e territorit të komunës. Sipas Ganiut, pas angazhimit të një kompanie të licencuar për largimin e mbeturinave jashtë kontejnerëve, ndërhyrja nga autoritetet komunale dhe policore ka bllokuar punën.

“Që në ditën e parë që filluam me pastrimin, pa kaluar as një orë nga paralajmërimi im, u dërgua Inspektorati i Qytetit të Shkupit, u bllokua kamioni, u thirr asistencë policore dhe tani kërkojnë konfiskimin e kamionit për arsye që nuk na janë sqaruar”, deklaroi Ganiu për TV21.

Ai shtoi se situata në Çair është pasojë e mungesës së kapaciteteve të ndërmarrjes publike. Sipas tij, numri i kontejnerëve në komunë është zvogëluar ndjeshëm ndër vite.

“Kur drejtues ishte z. Ragip Doçi, Çairi kishte 530 kontejnerë. Sot ka vetëm 320. Dikush po investon që kjo të jetë pamja e komunës së Çairit. Në çdo cep kemi grumbullime mbeturinash”, shtoi Ganiu, duke theksuar se do të ndërpresin pastrimin vetëm nëse rriten kapacitetet aktuale të Higjienës Komunale.

Në anën tjetër, drejtori i NP “Higjiena Komunale”, Sabahudin Rustemi, mohon akuzat dhe e akuzon Ganiun për veprime të paligjshme.

“Automjeti i angazhuar nga komuna është konfiskuar sepse nuk ka pasur marrëveshje për deponimin e mbeturinave. Komuna nuk ka kontratë me deponinë Drisla, dhe nuk dihet se ku i hedh mbeturinat e mbledhura. A po krijon z. Ganiu deponi të paligjshme dhe po rrezikon shëndetin e qytetarëve?”, pyet Rustemi publikisht në deklaratë për TV21.

Ky përplasje mes dy institucioneve ngre shqetësime serioze për menaxhimin e mbeturinave në një nga komunat më të populluara të Shkupit, ndërsa qytetarët vazhdojnë të përballen me grumbullime të mëdha të mbeturinave në rrugë. Flaka Media