Leje ndërtimi e paligjshme – përfshihet edhe kryetari i komunës

Sektori për Punë të Brendshme në Kumanovë ka ngritur kallëzim penal ndaj tre personave nga Kriva Pallanka – K.P. (59), M.K. (41) dhe S.M. (38) – për shkak të dyshimeve për kryerjen e veprës penale “keqpërdorim i pozitës dhe autorizimit zyrtar”.

I pari i denoncuar, K.P., i punësuar në Komunën e Kriva Pallankës, ka vepruar në kundërshtim me Ligjin për Ndërtim dhe me detyrimet e tij të punës, duke lëshuar në mënyrë të paligjshme një vendim për ndërrimin e investitorit, edhe pse leja e mëparshme për ndërtim kishte skaduar.

E dyta e denoncuar, M.K., shefe e Sektorit për Urbanizëm, Trafik dhe Mbrojtje të Mjedisit Jetësor në të njëjtën komunë, gjithashtu ka vepruar në kundërshtim me detyrimet e saj duke mos ushtruar mbikëqyrjen e duhur dhe duke nënshkruar vendimin si të vlefshëm. Me këtë veprim, ajo i ka mundësuar personit G.S. nga Kriva Pallanka të vazhdojë ndërtimin e një shtëpie me hapësirë afariste pa pasur leje të vlefshme për ndërtim.

I treti i denoncuar, S.M., në cilësinë e kryetarit të Komunës së Kriva Pallankës, nuk ka ushtruar kontrollin e nevojshëm mbi vendimin e lëshuar dhe e ka miratuar atë si të vlefshëm përmes nënshkrimit ose vendosjes së vulës zyrtare.

Rasti tashmë është dorëzuar në Prokurorinë Publike për procedurë të mëtejme. Flaka