LSDM dhe VMRO-DPMNE në përplasje për rastet tragjike në Koçan dhe Tetovë

Përplasjet politike për rastet tragjike në Maqedoninë e Veriut janë thelluar, me akuza të ndërsjella mes LSDM-së dhe VMRO-DPMNE-së lidhur me zjarrin në diskotekën “Pulse” në Koçan dhe atë në spitalin modular në Tetovë, shkruan Flaka Media

LSDM kërkon hetim urgjent ndaj shefes së Departamentit të Punëve të Brendshme të Koçanit, Marija Cvetkovska Manevska, për siç thotë partia, përgjegjësi direkte në tragjedinë e diskotekës “Pulse”. Zëdhënësja Bogdanka Kuzeska ngriti një sërë pyetjesh ndaj Prokurorisë dhe Hristijan Mickoskit:

• Pse nuk është hapur hetim kundër Manevskës?
• A është ajo përgjegjëse për mosreagim ndaj paralajmërimeve zyrtare për shkelje ligjore në diskotekë?
• A po mbrohen drejtuesit policorë për të fshehur përgjegjësinë politike?

Nga ana tjetër, VMRO-DPMNE sulmon ish-ministrin e Shëndetësisë, Venko Filipçe, duke e akuzuar për veprime të dyshimta menjëherë pas zjarrit në spitalin modular të Tetovës, ku humbën jetën 14 persona.
Valentin Manasievski pretendon se Filipçe ka aneksuar kontratat me kompaninë ndërtuese, duke rritur çmimin për 20% dhe duke ndryshuar materialet e ndërtimit pas tragjedisë.
“A janë këto 20% arsyeja e zjarrit në Tetovë? Dhe a kanë përfunduar ato para në xhepat e dikujt?”, pyeti Manasievski.

Përplasja verbale mes dy partive më të mëdha maqedonase po ndodh në një klimë të rënduar publike, ku përgjegjësia për humbjen e jetëve ende nuk është sqaruar plotësisht. Flaka Media