Maqedonia e Veriut me besim të brishtë në BE – Optimizmi më i lartë në Shqipëri dhe Mal të Zi

Sipas rezultateve të fundit nga Eurobarometri i vjeshtës 2024, 54% e qytetarëve në Maqedoninë e Veriut thonë se i besojnë Bashkimit Evropian, ndërsa 42% kanë tendencë të mos e besojnë atë, njofton Flaka Media. Këto të dhëna paraqesin një rënie të lehtë krahasuar me vitin e kaluar, kur besimi ishte në 56%.

Në nivel rajonal, Mal i Zi (83%) dhe Shqipëria (80%) shfaqin nivelin më të lartë të besimit ndaj BE-së, ndërsa Serbia mbetet më skeptike, me vetëm 37% të qytetarëve që i besojnë unionit dhe 57% që shprehin mosbesim.

Në Kosovë, niveli i besimit është gjithashtu i lartë, me 79% të qytetarëve që kanë një qëndrim pozitiv ndaj BE-së. Në Bosnjë-Hercegovinë, 58% besojnë në BE, ndërsa 37% jo.

Për sa i përket anëtarësimit në BE, optimizmi është më i lartë në Shqipëri dhe Mal të Zi, ku mbi 80% e qytetarëve besojnë se kjo do të ishte një gjë e mirë. Në Maqedoninë e Veriut dhe Bosnjë-Hercegovinë, ky qëndrim mbështetet nga 50 deri në 60% e qytetarëve, ndërsa në Serbi, vetëm 34% mendojnë se anëtarësimi në BE do të ishte pozitiv.

Ndërkohë, brenda vetë Bashkimit Evropian, 54% e qytetarëve mbështesin zgjerimin, ndërsa 39% janë kundër. Megjithatë, skepticizmi është më i theksuar në disa shtete anëtare:

• Gjermania dhe Austria: Vetëm 42% në favor, 53% kundër
• Franca: 41% në favor, 49% kundër, megjithëse opozita ka rënë në krahasim me anketat e mëparshme

Rezultatet e Eurobarometrit pasqyrojnë dinamikën komplekse të perceptimeve ndaj BE-së – një kombinim mes dëshirës për integrim dhe zhgënjimit të akumuluar nga procesi i gjatë i anëtarësimit, sidomos në vendet si Maqedonia e Veriut. Flaka Media