Merita Koxhaxhiku nga koalicioni VLEN, akuza Osmanit

Merita Koxhaxhiku nga koalicioni VLEN reagoi ndaj deklaratës së fundit të Bujar Osmanit, ku ai nuk mohoi se ka pasur takime me ish-kryeministrin e arratisur Nikolla Gruevski.

„Këto ditë jemi dëshmitarë të një deklarate skandaloze nga Bujar Osmani, një person që për më shumë se dy dekada ka keqpërdorur besimin e shqiptarëve. Ai publikisht refuzoi të mohojë – pra, në mënyrë të tërthortë pranoi – se është takuar me Nikolla Gruevskin, një i arratisur dhe person i shpallur non grata nga Shtetet e Bashkuara të Amerikës,“ tha Koxhaxhiku.

Sipas saj, ky është tregues i qartë se BDI nuk është një parti e reformuar, por „një grup interesash që manipulojnë me ndjenjat kombëtare dhe aspiratat evropiane të popullit shqiptar për interesa të ngushta personale dhe partiake.“

Ajo i drejtoi disa pyetje publike Osmanit:

• „Prej kur takimet e një ministri të jashtëm me persona që janë në listën e zezë amerikane janë të klasifikuara si sekret shtetëror?“
• „A janë raportuar këto takime në Prokurorinë Publike dhe Ministrinë e Brendshme?“
• „Cili është interesi pas këtij komunikimi të fshehtë?“

Koxhaxhiku rikujtoi se ndihma për arratisjen e Nikolla Gruevskit ishte „vepër e BDI-së“, po ashtu edhe „ligji për amnisti për Sasho Mijalkovin dhe klikën e tij.“

„Të gjitha këto i shohim si shenjë të dëshpërimit të një elite të korruptuar që e di se koha e saj po mbaron. BDI e ka shndërruar politikën në treg dhe në biznes, ndërsa shqiptarët i ka bërë peng të marrëveshjeve të tyre me të arratisur nga drejtësia dhe kriminelë,“ theksoi ajo.

Në fund, përfaqësuesja e VLEN-it u shpreh se koalicioni është i vendosur për të sjellë ndryshimin:
„VLEN është këtu për të rikthyer politikën e pastër, për të garantuar transparencë dhe për t’i dhënë fund kësaj hipokrizie. Qytetarët meritojnë përgjegjësi, jo marrëveshje të fshehta me njerëz që e kanë plaçkitur shtetin.“