Mexhiti: Mbeturinat, sfidë dhe mundësi për zhvillim të gjelbër

Zëvendëskryeministri i parë dhe Ministër i Mjedisit Jetësor dhe Planifikimit Hapësinor, Izet Mexhiti, mori pjesë sot në Konferencën e 6-të Ndërkombëtare “Rruga drejt menaxhimit të qëndrueshëm të mbeturinave”, organizuar nga Shoqata për Menaxhim me Mbeturina të Ngurta – MASWA, njofton Flaka

Në fjalën e tij, ministri Mexhiti theksoi se menaxhimi i qëndrueshëm i mbeturinave dhe zhvillimi i ekonomisë qarkore janë thelbësore për përballimin e ndryshimeve klimatike dhe për mbrojtjen e mjedisit jetësor.

“Menaxhimi i mbeturinave nuk është vetëm një sfidë, por edhe një mundësi për të zhvilluar teknologji të reja dhe për të forcuar ekonominë e gjelbër. Ne jemi të përkushtuar për krijimin e një sistemi rajonal modern dhe efikas të menaxhimit të mbeturinave, duke ndërtuar deponinë e parë rajonale të standardizuar në vend,” u shpreh ai.

Ministri nënvizoi rëndësinë e bashkëpunimit ndërkomunal dhe ndërsektorial, si dhe përputhshmërinë me standardet e Bashkimit Evropian, për të arritur një sistem transparent dhe efikas. Ai informoi gjithashtu për hapat e ndërmarrë në drejtim të pastrimit të deponive ilegale, duke theksuar rëndësinë e një ambienti të pastër për shëndetin publik dhe cilësinë e jetës.

Në fund të fjalës së tij, Mexhiti theksoi se mbrojtja e mjedisit është një mision i përbashkët dhe se përmes bashkëpunimit do të mund të ndërtohet një e ardhme më e qëndrueshme për të gjithë qytetarët. Flaka