Mickoski me referat kundër Taravarit: BDI manipulon strukturat shqiptare | VIDEO

Kryeministri i Maqedonisë së Veriut dhe lideri i VMRO-DPMNE-së, Hristijan Mickoski, ka drejtuar kritika të forta ndaj Arben Taravarit, pas largimit të këtij të fundit nga qeveria, duke e cilësuar si një vendim të motivuar nga kalkulime personale dhe jo nga parime, përcjell Flaka

Në fjalimin e tij gjatë tubimit për 20-vjetorin e Unionit të Grave të VMRO-DPMNE-së, Mickoski u shpreh se Taravari ka zgjedhur të bëhet vegël e BDI-së dhe se sjellja e tij politike – duke hyrë e dalë nga qeveria – është vazhdim i praktikave të vjetra politike.

“Kalkulimet e tij nuk do të dalin mirë në afat të gjatë për partinë e tij. Partnerët e tij aktualë nga BDI së shpejti do ta kuptojnë se ky partneritet është i përkohshëm dhe do ta braktisin sapo të marrin një ofertë më të mirë,” tha Mickoski.

Ai theksoi se vendimi i tij për ta mbajtur përkohësisht Taravarin në qeveri ishte i qëllimshëm, për ta parë vetë se si do të sillej dhe për të kuptuar nëse do të qëndronte i përkushtuar ndaj fjalës së dhënë.

“Shumë më thoshin ta largoj më herët, por unë doja ta lë të tregojë vetveten. Dhe ja ku jemi: Arbeni ka vendosur të bëjë kompromis me njerëz që dikur i kritikonte më ashpër se unë,” shtoi ai.

Mickoski akuzoi drejtpërdrejt BDI-në për ndërhyrje dhe përpjekje për të manipuluar strukturat shqiptare përmes ofertave dhe presioneve politike.

“BDI ka metodat e veta të bindjes. Duket se Ali Ahmeti e ka impresionuar Taravarin aq sa të harrojë fjalët e dhëna, dhe të rrezikojë që partia e tij të margjinalizohet,” u shpreh kryeministri.

Në fund të fjalës së tij, Mickoski bëri thirrje për ndershmëri dhe përkushtim ndaj fjalës së dhënë, duke theksuar se kjo nuk është një betejë etnike apo ideologjike, por një ndarje mes qytetarëve të ndershëm dhe politikanëve të korruptuar.

“Në njërën anë janë banditët, dhe në anën tjetër është Maqedonia dhe të gjithë qytetarët e saj të ndershëm – maqedonas, shqiptarë, turq, romë, serbë, boshnjakë dhe të tjerë,” përfundoi Mickoski.