Mickoski: Shkenca, prioritet i Qeverisë

Kryeministri i Maqedonisë së Veriut, Hristijan Mickoski, mori pjesë në një aktivitet në Fakultetin e Inxhinierisë Mekanike në Shkup, ku shprehu mbështetje të fuqishme për projektet nga veprimtaria kërkimore-shkencore në vend, transmeton Flaka. Në fjalën e tij, Mickoski theksoi rëndësinë strategjike të investimit në shkencë dhe arsim për zhvillimin afatgjatë të shtetit.

“Është mirë të jesh në shtëpi, ky është institucioni im dhe ndiej emocion të veçantë. Vetë ngjarja është mesazh se fokusi i kësaj Qeverie është shkenca,” deklaroi Mickoski, duke vlerësuar bashkëpunimin mes fakultetit, Universitetit “Shën Kirili dhe Metodi” dhe Zyrës së Komisionit Evropian në Shkup.

Kryeministri nënvizoi se pa një arsim të fuqishëm dhe shkencë të zhvilluar, nuk mund të ketë përparim ekonomik apo zhvillim të qëndrueshëm në vend:

“Pa arsim të fuqishëm që nga parashkollorja deri në universitet, nuk mund të kemi rritje ekonomike të qëndrueshme. Vetëm përmes shkencës mund të ecim përpara,” shtoi ai.

Ai gjithashtu theksoi rëndësinë e shkëmbimit ndërkombëtar të shkencëtarëve, si mënyrë për të përfituar nga njohuritë globale, për të rritur bashkëpunimin shkencor dhe për të ndihmuar industrinë vendase:

“Me shkëmbim të shkencëtarëve krijohet rrjetëzim, ndodh transfer i dijes dhe ndihmohet industria – kjo është rruga drejt një ekonomie më të zhvilluar.”

Në përfundim, Mickoski garantoi se Qeveria do të jetë mbështetëse aktive e çdo iniciative shkencore, duke e quajtur këtë “një ditë të veçantë” për vetë angazhimin e institucioneve akademike në shërbim të zhvillimit të vendit.

Ngjarja u vlerësua edhe nga përfaqësues të botës akademike dhe partnerët ndërkombëtarë, duke u konsideruar si një hap i rëndësishëm drejt afrimit të kërkimit shkencor me nevojat reale të ekonomisë dhe industrisë në Maqedoninë e Veriut. Flaka Media