Osmani: Mickoski po kthen shqiptarët para Marrëveshjes së Ohrit – Zgjedhjet, referendum!

Bujar Osmani nga BDI, në një deklaratë publike për zgjedhjet e tetorit që i karakrerizon si referendum, tha se vijimin do ta japin qytetarët në vendvotime, por theksoi se politika e qeverisë aktuale është drejtuar qartë kundër shqiptarëve, transmeton Flaka Media

“Qeveria e VMRO-së dhe e ZNAM-it, e udhëhequr nga Hristijan Mickoski, me intensitet të plotë po vazhdon ta zbatojë politikën që synon t’i largojë shqiptarët nga proceset shoqërore, duke i kthyer në pozitat periferike të para Marrëveshjes së Ohrit,” deklaroi Osmani.

Ai tha se kjo politikë shpesh shihet edhe në retorikën personale të Mickoskit, por edhe në mënyrën institucionale të veprimit:

“Shqiptarët janë të përjashtuar nga kabineti i tij personal, nga rrethi administrativ në ndërtesën e qeverisë dhe nga grupet punuese qeveritare e delegacionet zyrtare, ku ose nuk ka shqiptarë fare, ose ka nga një i vetëm me rol të margjinalizuar.”

Osmani kujtoi se intoleranca e Mickoskit ndaj shqiptarëve është e njohur edhe për partnerët ndërkombëtarë:

“Kjo intolerancë thelbësore është e njohur edhe nga partnerët tanë strategjikë, të cilët shpesh e kanë paralajmëruar dhe qortuar.”

Duke përmendur shembuj konkretë, Osmani tha:

“Shfuqizimi i Balancerit çoi në punësime njëetnike; interpretimet e shtrembëruara të regjistrimit rezultuan me vendimin e padrejtë të KSHZ-së për zvogëlimin e numrit të këshilltarëve shqiptarë; ndërsa heqja e mekanizmave mbrojtës si Badenteri e Balanceri është përpjekje për ta shndërruar vendin në sistem të pastër majoritar.”

Në këtë drejtim, ai akuzoi qeverinë për strategji antievropiane:

“Përveç përkeqësimit të marrëdhënieve me Bullgarinë, tashmë shohim provokime edhe ndaj Greqisë, përmes shkeljes së Marrëveshjes së Prespës. Kjo është një strategji për ta larguar vendin nga mekanizmat e mbikëqyrjes dhe kontrollit të BE-së.”

Për VLEN-in, Osmani u shpreh ashpër:

“Më e mjera është pozita e VLEN-it në qeveri. Ata vetë janë të përjashtuar nga tavolina kur merren vendimet, por më tragjike është që pastaj detyrohen të sillen si vasalë, duke i zbatuar, justifikuar dhe legjitimuar ato vendime.”

Në fund, ai tha se shqiptarët këto zgjedhje i shohin si referendum:

“Shqiptarët nuk pranojnë më të jenë mysafirë në shtetin e tyre; nuk pranojnë më të poshtërohen e nënshtrohen, madje as të heshtin kur ndodh kjo. Shqiptarët nuk do të heqin dorë nga e ardhmja evropiane e këtij vendi, nuk do të pranojnë që vendi të rrëshqasë në përqafimin e ‘botës serbe’ dhe boshtit ruso-kinez. Ata nuk e kuptojnë, por së shpejti do t’u bëhet e qartë.” Flaka Media