Panairi i Librit “Ulqin 2024”, Irena Toçi: Autorët dhe botuesit më të shquar shqiptarë dhe të rajonit shfaqën punimet e tyre

Drejtuesja e Institutit të Librit dhe Promocionit, Irena Toçi, ka dhënë detaje të rëndësishme për Panairin e Librit Ulqini 2024, që si çdo vit mbledh botuesit dhe autorët më të shquar të Shqipërisë, por edhe rajonit.

Në një intervistë për News24, Toçi theksoi se Panairi, i cili mbahet çdo vit në qytetin e Ulqinit, ka arritur të bashkojë mbi 50 botues shqiptarë dhe ka prezantuar qindra botime të reja.

Panairi këtë vit ka pasur një pjesëmarrje të gjerë nga botues të mëdhenj të Shqipërisë, Kosovës dhe rajonit. Mes tyre ishte i ftuar edhe studiuesi arbëresh Italo Saro, i cili ka ndarë eksperiencën e tij në këtë event të rëndësishëm kulturor. Sipas Toçit, ky panair është një mundësi e shkëlqyer për të promovuar vlera dhe letërsi, dhe për të lidhur njerëz dhe ide.

Në këtë ngjarje, u ndanë gjithashtu çmimet letrare për vitin 2024, të cilat janë dhënë nga një jurie e përbërë nga studiuesi Behar Gjoka, shkrimtari Liridon Mulaj dhe profesori Ismet Kallaba. Çmimet përfshinin katër kategori, me çmimin më të rëndësishëm, “Ulcinium”, që shkoi për dy autorët Viola Isufaj dhe Erion Kristo.

Toçi nënvizoi rëndësinë e këtij panairi si një platformë që promovon dhe nderon letërsinë dhe botuesit më të mirë të vitit. Panairi e ka konsoliduar veten si një ngjarje të rëndësishme kulturore në rajon, duke ofruar mundësi për autorë dhe botues për të shkëmbyer ide dhe për të ndarë punën e tyre me një audiencë të gjerë.