Qeveria hap linjë ndihme për të prekurit nga tragjedia në Koçan

Që nga sot, është vënë në funksion një linjë telefonike për të gjithë të lënduarit dhe familjarët e tyre pas shpërthimit tragjik në Koçan, kumton Flaka. Qeveria njofton se përmes këtij numri kontakti – 070 355 526 – qytetarët mund të paraqesin nevojat, kërkesat dhe propozimet e tyre në mënyrë të drejtpërdrejtë.

Linja është e menaxhuar nga Zyra e Kryetarit të Qeverisë dhe synon të sigurojë komunikim të pandërprerë dhe ndihmë konkrete për personat e prekur.

“Askush nuk do të harrohet. Prioriteti ynë është që të gjithë të lënduarit të marrin kujdesin mjekësor adekuat dhe të rehabilitohen plotësisht”, theksohet në njoftimin e Qeverisë.

Qendra Ponikva në shërbim të rehabilitimit

Në mbledhjen e fundit të Qeverisë është vendosur që qendra turistike Ponikva, që gjendet nën menaxhimin e Ministrisë së Punëve të Brendshme, t’i kalojë përkohësisht Ministrisë së Shëndetësisë për qëllime mjekësore dhe rehabilitimi.

Qendra disponon me 27 dhoma dhe 56 shtretër, dhe do të pajiset me staf mjekësor shtesë për të ofruar përkujdesje të specializuar për pacientët që ndodhen jashtë rrezikut për jetën por kanë ende nevojë për trajtim.

Thirrje për përmbajtje dhe përgjegjësi

Qeveria gjithashtu u bëri thirrje partive politike që të përmbahen nga, siç u quajt, “nekrofili politike”, duke kërkuar që hetimet dhe institucionet të lejohen të kryejnë punën e tyre pa ndërhyrje politike apo manipulime publike.

“Çdo person i përfshirë në këtë rast do të mbajë përgjegjësi, pavarësisht pozitës apo përkatësisë politike. Drejtësia po vjen dhe do të jetë përgjigjja për të gjithë”, thuhet më tej në deklaratë.