Qeveria: Investimet në arsimin dual po japin rezultatet e para

Ministria e Arsimit dhe Shkencës ka rritur ndjeshëm numrin e vendeve për regjistrim në shkollat e mesme profesionale për vitin shkollor 2025/2026, me fokus të veçantë në arsimin dual, transmeton Flaka. Nga gjithsej rreth 28.000 vende të lira për nxënësit e rinj, 18.500 janë dedikuar për shkolla profesionale, ndërsa 6.725 prej tyre në arsim dual, të ndara në 269 paralele në të gjithë vendin.

“Arsimi dual nuk është më vetëm ide. Ai është realitet që po jep rezultat – nxënësit do të mësojnë teorinë në shkollë dhe praktikën në kompani reale”, deklarojnë nga Qeveria.

Një nga risitë më të rëndësishme është rritja e bursave për nxënësit në arsim dual, të cilat këtë vit janë rritur në 1.570 bursa, krahasuar me vitet e mëparshme. Nxënësit që do të ndjekin arsimin dual dhe do të plotësojnë kushtet e konkursit përkatës, do të përfitojnë bursë mujore prej 3.500 denarësh për 9 muaj në vit, që financohet nga një fond prej 50 milionë denarësh.

Përveç kësaj, është rritur edhe numri i kompanive bashkëpunuese që do të ofrojnë mësim praktik për nxënësit. Rreth 550 kompani janë angazhuar për të ndihmuar të rinjtë në përvetësimin e aftësive të kërkuara në tregun e punës.

“Kjo do të thotë që të rinjtë, gjatë shkollimit, do të përfitojnë përvojë praktike dhe do të jenë të gatshëm për punësim menjëherë pas përfundimit të arsimit të mesëm profesional”, thuhet në njoftimin e MASH.

Qeveria thekson se qëllimi strategjik është të krijojë kushte që të rinjtë të qëndrojnë dhe të ndërtojnë të ardhmen në Maqedoni, në vend se të kërkojnë mundësi jashtë vendit.

“U obliguam për ndryshime dhe këtë po e realizojmë. Krijojmë ardhmëri dhe e zhvillojmë Maqedoninë. Shteti është në rrugën e ndryshimeve!”, përfundon njoftimi i Qeverisë.