Raporti i autopsisë për Vedat Ademin dorëzohet në Prokurori – priten akuzat

Instituti i Mjekësisë Ligjore ka dorëzuar në Prokurorinë Themelore Publike të Kumanovës gjetjet e autopsisë për rastin e Vedat Ademit, 32-vjeçari nga Kumanova që ndërroi jetë më 17 mars në Spitalin e Përgjithshëm të qytetit, trasnmeton Flaka Media

Sipas njoftimit për Portalb.mk, gjetjet po shqyrtohen në korelacion me prova të tjera dhe pritet që prokurori publik të marrë vendimin përfundimtar mbi përgjegjësinë penale.

Zëdhënësja e Prokurorisë, Biljana Arsovska, kishte deklaruar më parë se Prokuroria kishte pranuar vetëm raportin e Inspektoratit Shtetëror Sanitar Shëndetësor, ndërsa ishte në pritje të autopsisë për të vendosur mbi ngritjen e mundshme të akuzave për “mjekim të pandërgjegjshëm” apo “vepra të rënda kundër shëndetit të njerëzve”.

Familjarët e të ndjerit, babai Amet Ademi dhe vëllai Sead Ademi, pretendojnë se Vedatit i është dhënë ilaç ndaj të cilit ishte alergjik dhe fajësojnë për këtë mjekun kujdestar, Zoran Gjeorgjievski.

Drejtori i atëhershëm i spitalit, Stefan Trajanovski, pranoi se pacientit i ishte dhënë terapi, por pas përkeqësimit të gjendjes ai kishte ndërruar jetë. Si pasojë, më 19 mars, Ministri i Shëndetësisë Arben Taravari e shkarkoi Trajanovskin dhe në vend të tij emëroi Sasho Stoshevskin.

Pas raportit të autopsisë, pritet të qartësohet përgjegjësia mjekësore dhe penale për vdekjen e 32-vjeçarit. Flaka Media