Reagon Aleanca: Sulmi në Manastir dëshmi e albanofobisë, policia mbyll sytë

Ngjarja e ndodhur në “Rrugën e Gjerë” në Manastir, ku një i ri u sulmua vetëm pse mbante veshur një bluzë me simbole shqiptare, ka nxitur reagimin e fuqishëm të Aleancës për Shqiptarët. Ky subjekt politik e ka cilësuar incidentin si një akt të turpshëm dhe thellësisht shqetësues.

“Ky akt nuk është vetëm një rast i izoluar, por pasqyron klimën e albanofobisë që lejohet dhe nxitet nën heshtjen e institucioneve shtetërore,” thuhet në reagimin e Aleancës.

Sipas tyre, qeveria aktuale, me qasjen diskriminuese dhe politikat përjashtuese, ka krijuar terren që manifestimet e urrejtjes ndaj shqiptarëve të shfaqen hapur. “Edhe më skandaloze është mungesa e reagimit dhe përgjigjes së duhur nga policia, e cila në vend që të garantojë siguri dhe barazi për të gjithë qytetarët, shpesh zgjedh të mbyllë sytë ndaj rasteve të tilla,” theksohet më tej.

Aleanca për Shqiptarët kërkon hetim të menjëhershëm dhe marrje të masave konkrete:
“Ne e dënojmë fuqishëm këtë akt të ulët dhe kërkojmë identifikimin dhe ndëshkimin e autorëve, si dhe përgjegjësi nga organet e rendit për mosveprimet e tyre.”

Në fund, ky subjekt politik thekson se çdo akt i tillë nuk është vetëm kundër shqiptarëve, por cenon të ardhmen e vendit.
“Çdo sulm i tillë që manifeston urrejtje ndaj dinjitetit kombëtar shqiptar është sulm ndaj bashkëjetesës dhe demokracisë,” përfundon reagimi i Aleancës për Shqiptarët. Flaka