Shumica siguron Badenterin me votat e opozitës: Deputeti Bejxhan Iljaz voton “pro”, Sela distancohet

Lëvizjet politike në Kuvendin e Maqedonisë së Veriut duket se po formalizohen, edhe pse ende jo në mënyrë zyrtare. Deputeti i Frontit Europian, Bejxhan Iljaz, në seancën e fundit parlamentare, ka mbështetur disa propozim-ligje kadrovike me votë “për”, ndonëse për to mungonte mbështetja e plotë nga deputetët jo maqedonas që përbëjnë shumicën e Badenterit.

Ky veprim u komentua edhe nga Ziadin Sela, bashkëkryetar i Frontit Europian, i cili tha se nuk është konsultuar fare për votën e Iljazit dhe se çdo deputet vepron në mënyrë autonome, por theksoi se është kundër lëvizjeve të fshehta dhe “marrjes së deputetëve”.

“Deputeti është përfaqësues i popullit. Nuk ndërtohet politikë e shëndoshë duke marrë këtë ose atë deputet”, deklaroi Sela në konferencë për media.

Mbështetja e Iljazit, vendimtare për Badenterin

Deputeti Iljaz sqaroi për “Alsat” se votën e tij e dha vetëm për çështje kadrovike, duke përmendur konkretisht Këshillin Programor të RTVM-së dhe Agjencinë për Shërbime Mediatike, për të cilat theksoi se ishin të bllokuara.

“Mbështetja ime kishte për qëllim zhbllokimin e punës së redaksioneve turke në RTVM. Ligjin për Inspektoratin e Gjuhëve nuk e kam votuar. Nuk do të votoj për ligje që kërkojnë Badenter sepse jam pjesë e opozitës”, deklaroi Iljaz.

20 vota jo-maqedonase për të kaluar propozimet

Për kalimin e propozimeve kadrovike nevojiten 20 vota nga deputetët jo-maqedonas, për të përmbushur shumicën e Badenterit, pasi Kuvendi ka 39 deputetë jo-maqedonas me të drejtë vote në votime të dyfishta.

Në seancën e djeshme:

• Votuan 3 deputetët e ASH-së së Taravarit,
• 2 deputetë të LSDM-së opozitare,
• dhe deputeti Bejxhan Iljaz nga Fronti Evropian.

Këto vota ishin të mjaftueshme për të kaluar Këshillin Programor të RTVM-së dhe Agjencinë për Mediat, ndërsa ligji për Inspektoratin e Gjuhëve nuk u mbështet nga Iljaz, por kaloi me ndihmën e pjesës tjetër të opozitës.

Edhe pse ende nuk ka sinjale të qarta për një marrëveshje politike të formalizuar, lëvizjet e fundit ngrenë pyetje mbi mbështetjen e shumicës parlamentare nga deputetë të opozitës në votime kyçe që kërkojnë Badenterin.

Për momentin, shumica parlamentare ka vetëm 14 deputetë jo-maqedonas, dhe pa mbështetje të deputetëve nga opozita, nuk mund të miratojë ligje që kërkojnë shumicë të dyfishtë.