Stuhi, breshër dhe erëra të forta sot në pjesën më të madhe të vendit

Pas motit të keq që dje (e diel, 17 gusht) përfshiu Lubojnon e Resnjës duke shkaktuar dëme dhe përmbytje në rrugë e shtëpi, sot (e hënë, 18 gusht) pritet mot i ri i keq në disa pjesë të Republikës së Maqedonisë.

“Vendi ynë do të ndikohet nga masa ajrore e lagësht dhe jostabile, e lidhur me një front atmosferik nga veriu me ajër më të ftohtë në lartësi,” njoftojnë meteorologët.

Sipas tyre, “moti do të jetë pjesërisht i vranët dhe i paqëndrueshëm, me reshje të rrëmbyeshme shiu, bubullima dhe erë të fortë në pjesën më të madhe të vendit”. Lokalisht proceset atmosferike do të jenë më intensive, duke sjellë “stuhi të shoqëruara nga reshje të dendura shiu, erë e fuqishme, shkarkesa elektrike dhe reshje breshëri”.

Edhe në Shkup dhe rrethinë sot pritet mot i paqëndrueshëm. “Në disa pjesë të luginës priten kushte për stuhi të shoqëruara me erëra të fuqishme dhe breshër,” theksojnë shërbimet meteorologjike.

Temperaturat e ditës së sotme do të lëvizin nga 25 deri në 34 gradë Celsius, ndërsa në Shkup dhe rrethinë pritet që maksimalja të arrijë deri në rreth 32 gradë.

Institucionet përkatëse u bëjnë apel qytetarëve që, për shkak të motit shumë jostabil, të tregojnë kujdes të shtuar.
“Gjatë stuhive dhe shkarkesave elektrike mos qëndroni në hapësira të hapura dhe nën pemë të vetmuara,” paralajmërojnë ekspertët.

Po ashtu, në rast të erërave të forta, qytetarëve u rekomandohet “të mbrojnë automjetet e tyre dhe të mos i parkojnë pranë pemëve, sidomos atyre të vjetra dhe të vetmuara.” Flaka Media