Sulejman Lamallari deklarohet në Gjykatë: Arsovska më sulmoi fizikisht, jam viktimë

Sulejman Lamallari, i akuzuar për dhunë fizike dhe verbale ndaj kryetares së qytetit të Shkupit, Danella Arsovska, sot para gjykatës deklaroi se në të vërtetë ai nuk është sulmues, por viktimë në të gjithë ngjarjen, shkruan Alsat.

Para gjykatës, Lamallari pretendoi se ishte sulmuar ndërsa Arsovska ndodhej në terren me zyrtarë në Çair pas një kallëzimi për ndërtim të paligjshëm.

“Atë ditë unë nuk sulmova askënd, unë u sulmova nga kryetarja. Ajo u afrua me telefon, unë vetëm i bëra me dorë, doja t’ia largoja telefonin për të mos regjistruar pa leje. E dëmtuara më goditi me këmbë, më shtyu me këmbë mbi gjurin, në këmbën e majtë”, thotë i akuzuari Sulejman Lamallari.

Pas kësaj dëshmie të Lamallarit, seanca e sotme vazhdoi me dëshmitë e mbrojtjes dhe asnjë nga ta nuk u përgjigj pozitivisht pyetjes së prokurorit publik nëse kishte parë që Lamallari e sulmonte fizikisht Arsovskën. Megjithatë, Lamallari tha se kishte përdorur fjalë fyese ndaj saj, por shtoi se e kishte bërë këtë pasi ajo e kishte ofenduar dhe kërcënuar e para. Pas seancës së sotme, Arsovska nuk dha deklarata për mediat, por u prononcua në rrjetet sociale.

“Nëse nuk është e tmerrshme që rrahën gra, në vend që meshkujt të ndërhyjnë, të pranojnë, të pendohen dhe të kërkojnë falje, tani ata mbrohen duke thënë se kanë marrë shkelm nga një grua”, tha Danella Arsovska, kryetare e qytetit të Shkupit.

Ngjarja ndodhi më 11 korrik, kur Arsovska, e shoqëruar nga inspektorë të Qytetit të Shkupit, po kryente inspektim të një objekti të paligjshëm në rrugën „Sevastopolska“ në Çair, ku ndodhi një debat verbal me Sulejman Lamallarin, dhe sipas pretendimeve të Arsovskës, ai e sulmoi fizikisht.