Tabelë zyrtare me gabim shqip në Tabanoc: Emri i shtetit, jashtë standardit

Në vendkalimin kufitar Tabanoc, mbishkrimi në gjuhën shqipe në një nga tabelat zyrtare përmban një gabim elementar gjuhësor. Në vend që të shkruhet saktë “Republika e Maqedonisë së Veriut”, aty figuron forma e pasaktë “Republikën e Maqedonisë së Veriut”, transmeton Flaka

Gabimi qëndron në përdorimin e rasës gabimisht – nga emërorja “Republika” në kallëzore “Republikën”, duke çrregulluar kuptimin e drejtë të emërtimit institucional të shtetit në këtë kontekst.

Kjo nuk është hera e parë që në tabela zyrtare në gjuhën shqipe shfaqen gabime të tilla. Në shumë raste, përkthimi i përmbajtjes bëhet përmes mjeteve automatike si Google Translate, pa ndonjë kontroll profesional nga përkthyes të licencuar ose njohës të mirë të drejtshkrimit të gjuhës shqipe.

Gabime të këtij lloji në hapësira publike, sidomos në dokumente zyrtare apo sinjalistikë në kufi, nuk janë vetëm shkelje të standardeve gjuhësore, por edhe tregues i mungesës së seriozitetit institucional ndaj përdorimit të gjuhës shqipe, e cila është gjuhë zyrtare në përputhje me Kushtetutën dhe ligjet në fuqi.

Mbetet për t’u parë nëse institucionet përkatëse, përfshirë Ministrinë e Punëve të Brendshme dhe Agjencinë për Zbatimin e Gjuhëve, do të reagojnë për ta korrigjuar këtë gabim dhe për të shmangur përsëritjen e rasteve të tilla në të ardhmen. Flaka