Vazhdojnë largimet nga VLEN: Zhgënjim dhe kalime drejt opozitës

VLEN sot u përball me zhvillime të rëndësishme që tregojnë tensione brenda koalicionit.

Në Tearcë, Muhamer Isaku, kryetar i nëndegës së Lëvizjes BESA, pjesë e VLEN-it, i është bashkuar Aleancës për Shqiptarët dhe koalicionit Aleanca Kombëtare për Integrim, duke shpallur përkrahjen për kandidaturën e Nazim Taipit për kryetar të Komunës. Lajmin e bëri të ditur vetë Taipi:

“Vizioni ynë për Komunën e Tearcës forcohet edhe më shumë me bashkimin Muhamer Isaku, i cili ka ushtruar pozitën e Kryetarit të Nëndegës së Lëvizjes BESA në Tearcë.”

Nga ana e tij, Isaku dhe strukturat lokale të BESËS theksuan:

“Nazim Taipi është një menaxher i dëshmuar në shumë sfera të shoqërisë dhe kandidati më i duhur për të parin e Tearcës.”

Në të njëjtën ditë, një tjetër largim erdhi nga Çairi. Fitore Qerezi, një nga themelueset e VLEN-it, shpalli dorëheqjen nga të gjitha pozitat partiake, duke shprehur zhgënjim të thellë nga mungesa e përkrahjes brenda partisë:

“Pas një reflektimi të gjatë, ju njoftoj se kam vendosur të jap dorëheqje nga të gjitha pozitat partiake nga partia që edhe vet isha themeluese! Te VLEN nuk kishte vend për mua, andaj distancohem nga çdo aktivitet politik,” shkroi Qerezi.

Ajo theksoi se vendimi lidhet me qëndrimin e kolegeve të kryesisë së Forumit të Gruas:

“Revoltën time e ndaj për mungesën e përkrahjes dhe mbështetjes nga anëtaret e kryesisë së FG-së, të cilat kanë qenë të njoftuara për padrejtësitë që i ka përjetuar një anëtare e tyre e përkushtuar dhe e zellshme.”

Në fund, Qerezi uroi sukses për ish-bashkëpunëtoret e saj:

“Nga sot, ju uroj shumë suksese në rrugëtimin tuaj dhe nuk ua dëshiroj asnjërës nga ju zhgënjimin e thellë që unë kam përjetuar.”

Këto zhvillime theksojnë tensionet e brendshme brenda VLEN-it dhe tregojnë dobësitë e kohezionit të koalicionit në prag të garave lokale. Flaka Media