VLEN: MEPSO dhe KOSTT lidhin marrëveshje historike për energjinë

Nën udhëheqjen vizionare të drejtorit të përgjithshëm të MEPSO-s, z. Burim Latifi, është bërë një hap historik në sektorin e energjisë në rajon: për herë të parë do të ndërtohet linja interkonektive 400 kV Tetovë–Prizren, një projekt strategjik që synon të forcojë lidhjet energjetike ndërmjet Maqedonisë së Veriut dhe Republikës së Kosovës.

“Marrëveshja e bashkëpunimit mes MEPSO-s dhe KOSTT-it për ndërtimin e kësaj linje është një prej zhvillimeve më domethënëse të dekadës në fushën e energjisë,” thuhet në njoftimin zyrtar të VLEN.

Sipas drejtuesve të projektit, interkoneksioni do të sjellë përmirësim rrënjësor në kapacitetet ndërkufitare të transmetimit të energjisë elektrike, do të forcojë sigurinë energjetike në të dyja shtetet dhe do të ndihmojë ndjeshëm në procesin e tranzicionit të gjelbër, në përputhje me standardet moderne.

“Kjo nuk është thjesht një linjë e tensionit të lartë. Është një simbol i fuqishëm i bashkëpunimit shqiptar, një investim për të ardhmen dhe një dëshmi konkrete se kur shqiptarët qeverisin me përgjegjësi dhe vizion, ndodhin gjëra të mëdha,” theksojnë nga VLEN.

Drejtori i MEPSO-s, Burim Latifi, u cilësua si një nga figurat kyçe për jetësimin e këtij projekti. “Falë përkushtimit dhe profesionalizmit të z. Latifi, ky projekt kalon nga ideja në realizim konkret. Ai do të jetë bazë për një rajon më të qëndrueshëm energjetikisht dhe më të integruar ekonomikisht,” thuhet më tej në deklaratë.

VLEN, përmes këtij projekti, ripohon angazhimin e saj për zhvillim rajonal, integrim të strukturave energjetike dhe forcim të identitetit ekonomik të shqiptarëve në Ballkan.

“Ky është Ballkani që ndërtojmë ne – me bashkëpunim, zhvillim dhe fuqi shqiptare në qendër të proceseve,” përfundon reagimi i VLEN.