Nga Kumanova te Dollneni – zonat shqiptare pa zë në kryesinë e VLEN-it
Botuar nga Driton Zenku
Përbërja e re e kryesisë së koalicionit VLEN ka hapur debat në opinionin publik, pasi struktura drejtuese duket e përqendruar kryesisht në dy qendra politike – Çair dhe Tetovë – ndërsa një numër i madh qytetesh dhe komunash shqiptare mbeten pa përfaqësim në nivelin më të lartë të koalicionit, shkruan Gazeta Flaka.
Sipas përbërjes së publikuar, koalicioni do të drejtohet nga bashkëkryetarët Bilall Kasami dhe Izet Mexhiti. Në strukturën drejtuese përfshihen edhe nënkryetarët Ilir Demiri dhe Bekim Qoku, ndërsa sekretar i përgjithshëm është Bekim Sali. Mexhiti dhe Sali vijnë nga Çairi kurse Kasami e Demiri nga Tetova. Qoku vjen nga Struga por me prejardhje nga Ohri dhe pa peshë politike në zonën nga vjen, pasi edhe deputet u zgjodh në listën e koalicionit në Zonën 6 – Tetovë e Gostivar.
Megjithatë, analiza e përfaqësimit territorial ka ngritur pikëpyetje, pasi në këtë strukturë nuk ka përfaqësues nga disa prej qyteteve kryesore shqiptare në Maqedonia e Veriut, si Kumanovë, Gostivar, Dibër, Strugë dhe Kërçovë.
Po ashtu, jashtë përfaqësimit në kryesinë e re mbeten edhe një sërë komunash shqiptare në dhe rreth Shkup, përfshirë Haraçinë, Saraj dhe Likovë.
Në të njëjtën kohë, edhe qytetet në jug të vendit me komunitete shqiptare mbeten pa zë në strukturën e re, si Manastir, Resnjë dhe Prilep.
Në këtë kontekst, kritikët vlerësojnë se drejtimi i ri i VLEN-it është i përqendruar kryesisht në dy baza politike lokale – Çair dhe Tetovë – ndërsa pjesa më e madhe e hapësirës shqiptare në vend mbetet jashtë vendimmarrjes së këtij koalicioni politik. Gazeta Flaka
Botuar nga Driton Zenku
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
