Arbër Ademi: Gjykata Kushtetuese është shndërruar në mjet të qeverisë për të minuar Marrëveshjen e Ohrit
Botuar nga Flaka
Deputeti i BDI-së, Arbër Ademi, ka reaguar ashpër pas zhvillimeve të fundit në Gjykata Kushtetuese e Maqedonisë së Veriut, duke akuzuar këtë institucion se po përdoret nga qeveria për të goditur arritjet që burojnë nga Marrëveshja e Ohrit.
Sipas Ademit, gjykata është shndërruar në një “instrument politik” që po ndërhyn në mënyrë të drejtpërdrejtë në rendin juridik të shtetit.
“Prej kohësh e kemi thënë: Gjykata Kushtetuese është shndërruar në mjet të kësaj qeverie për të minuar çdo arritje nga Marrëveshja e Ohrit,” deklaroi Ademi.
Ai drejtoi kritika edhe ndaj kryetarit të gjykatës, Darko Kostadinovski, duke e akuzuar për qasje diskriminuese ndaj shqiptarëve, në lidhje me projektin Safe City.
“Kryetari i këtij institucioni parapolitik, Kostadinovski nuk e fsheh anti-shqiptarizmin: për ‘Safe City’, sms-porositë të dërgohen vetëm në maqedonisht. Edhe në anglisht lëshohen porositë, por vetëm në shqip nuk mundet,” tha Ademi.
Sipas tij, një vendim i tillë bie ndesh edhe me vetë Kushtetutën e vendit.
“Me këtë ai shkel vetë Kushtetutën. Vendimi i tyre sot është keqpërdorim i pozitës zyrtare, duke ndërhyrë brutalisht në rendin juridik të vendit,” theksoi deputeti.
Ademi shtoi se në këtë vendimmarrje, dy gjyqtarët shqiptarë dhe një gjyqtar turk në gjykatë janë mbivotuar nga shumica.
“Edhe një herë, dy gjyqtarët shqiptarë dhe ai turk u mbivotuan si në vitet e nëntëdhjeta. Çfarë të themi më shumë?! Ata që thonin ‘rrini rehat, ka kush kujdeset për shqiptarët’, sot zë nuk guxojnë të bëjnë. Keq, shumë keq,” deklaroi Ademi. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
