Si të pastroni “feed”-in në YouTube nga videot pa vlerë

Platforma YouTube po përballet gjithnjë e më shumë me një rritje të përmbajtjeve që synojnë vetëm klikime, përfshirë video të prodhuara nga inteligjenca artificiale dhe materiale të ricikluara pa vlerë reale për përdoruesit.

Ekspertët paralajmërojnë se shikimi i këtyre videove ndikon drejtpërdrejt në algoritmin e platformës, duke bërë që përdoruesit të marrin gjithnjë e më shumë sugjerime të ngjashme. Për këtë arsye, ata rekomandojnë disa hapa të thjeshtë për të “pastruar” përvojën në platformë dhe për të rikthyer kontrollin mbi përmbajtjen që shfaqet në “feed”.

Hapi i parë është të shënoni videot që nuk ju interesojnë, duke përdorur opsionet “Nuk jam i/e interesuar” ose “Mos rekomando kanalin”. Një tjetër masë është pezullimi i historisë së shikimit në cilësimet e privatësisë, çka ndihmon në parandalimin e ndikimit të videove të rastësishme në rekomandime.

Gjithashtu, fshirja e plotë e historisë së shikimit konsiderohet një nga mënyrat më efektive për të “rifilluar” algoritmin, duke i lejuar platformës të sugjerojë përmbajtje të re bazuar në preferencat aktuale të përdoruesit.

Si alternativë, ekspertët sugjerojnë përdorimin e platformës në “Guest mode” ose pa u kyçur në llogari, sidomos në pajisje të përbashkëta si televizorët.

Këto hapa synojnë t’u japin përdoruesve një përvojë më cilësore dhe të personalizuar, duke shmangur përmbajtjen që nuk përputhet me interesat e tyre.

Flaka