OpenAI prezanton “Trusted Contact”, funksionin e ri të sigurisë për përdoruesit e ChatGPT

OpenAI ka prezantuar një funksion të ri sigurie për ChatGPT, i quajtur “Trusted Contact”, që synon të ofrojë një shtresë shtesë mbështetjeje për shëndetin mendor të përdoruesve të rritur.

Veçoria e re u mundëson përdoruesve të caktojnë një person të besuar — mik, familjar ose kujdestar — i cili mund të njoftohet në rast se sistemi identifikon biseda që lidhen me vetëlëndim apo vetëvrasje.

Sipas kompanisë, kjo ide bazohet në rekomandimet e ekspertëve të shëndetit mendor, të cilët theksojnë se lidhja me një person të afërt dhe të besuar mund të ketë ndikim real në momente krize. Ky funksion nuk zëvendëson linjat emergjente të ndihmës që ChatGPT ofron sipas vendndodhjes së përdoruesit, por shërben si një mbështetje shtesë.

“Trusted Contact” është plotësisht opsional. Çdo përdorues i rritur mund ta aktivizojë duke shtuar të dhënat e një personi tjetër të rritur. Kontakti i zgjedhur duhet ta pranojë ftesën brenda një jave dhe mund të hiqet ose ndryshohet në çdo kohë.

Në rast se sistemet automatike zbulojnë tema serioze që lidhen me vetëlëndim, ChatGPT fillimisht do ta inkurajojë përdoruesin të kontaktojë personin e besuar dhe do ta paralajmërojë se mund të dërgohet një njoftim. Më pas, rasti rishikohet nga një ekip i trajnuar posaçërisht dhe, nëse rreziku konsiderohet serioz, dërgohet një njoftim i shkurtër përmes emailit, SMS-së ose aplikacionit.

Kjo risi vjen si vazhdim i masave të tjera të sigurisë që kompanitë teknologjike kanë prezantuar kohët e fundit. Edhe Meta ka ndërmarrë hapa të ngjashëm në platformat e saj, duke njoftuar prindërit në raste kur fëmijët kërkojnë vazhdimisht për tema që lidhen me vetëlëndim në Instagram.

Flaka