WhatsApp rikthen në fokus funksionin që bllokon thirrjet nga numra të panjohur

WhatsApp po u kujton përdoruesve një nga funksionet më të rëndësishme të privatësisë dhe sigurisë në aplikacion: mundësinë për të heshtur thirrjet nga numra të panjohur.

Në një periudhë kur shqetësimet për spam-in dhe thirrjet e padëshiruara janë në rritje, platforma thekson se kjo veçori mund të ndihmojë përdoruesit të shmangin shqetësimet e panevojshme pa humbur thirrje potencialisht të rëndësishme.

“Këto thirrje nuk do të vijnë në telefonin tuaj, por do të jenë të dukshme në listën tuaj të thirrjeve në rast se janë dikush i rëndësishëm”, thuhet në njoftimin zyrtar të kompanisë.

Për të aktivizuar funksionin, përdoruesit duhet të hyjnë te:
Cilësimet → Privatësia → Thirrjet → Hesht thirrjet nga numra të panjohur.

Ky opsion mund të aktivizohet ose çaktivizohet në çdo moment, sipas preferencave personale të përdoruesit.

Gjithashtu, WhatsApp rikujtoi edhe seksionin “Privacy Checkup”, i cili ndodhet te Cilësimet dhe Privatësia. Ky seksion u lejon përdoruesve të kontrollojnë dhe përforcojnë nivelet e sigurisë për mesazhet, thirrjet, informacionet personale dhe statusin e aktivitetit online.

“Ju ndihmon të zgjidhni nivelin e duhur të mbrojtjes për ju, të gjitha në një vend”, thekson kompania.

Me rritjen e mashtrimeve online dhe thirrjeve të dyshimta, ekspertët e sigurisë digjitale rekomandojnë aktivizimin e këtyre funksioneve për një përvojë më të sigurt në aplikacionet e komunikimit.

Flaka