Trump: Marrëveshja me Iranin po ecën me ritëm të shpejtë

Presidenti amerikan Donald Trump është shprehur i bindur se Irani do të ndalojë programin e pasurimit të uraniumit dhe çdo përpjekje për zhvillimin e armëve bërthamore, pavarësisht tensioneve në negociatat me Uashingtonin.

Trump deklaroi se Shtetet e Bashkuara kanë kapacitetin për të ndaluar zhvillimin e një programi bërthamor ushtarak nga Teherani, duke theksuar: “100% ata do të ndalen”.

Ai shtoi gjithashtu se është personalisht i përfshirë në kontaktet me zyrtarët iranianë gjatë procesit të negociatave, duke theksuar se dialogu po vazhdon në mënyrë aktive.

Sipas tij, pala iraniane ka përdorur termin “do ta marrim pluhurin” për të përshkruar materialin bërthamor në diskutime, ndërsa Uashingtoni nuk është nën presion për të arritur një marrëveshje të menjëhershme.

“Nuk do të nxitohemi për asgjë, por po ecim me ritëm të shpejtë”, u shpreh Trump, duke shtuar se kundërpropozimi i fundit i Iranit është i papranueshëm.

Nga ana tjetër, presidenti iranian Masoud Pezeshkian ka deklaruar se Teherani mbetet i hapur për vazhdimin e negociatave me SHBA-në, pavarësisht mungesës së besimit mes dy palëve.

Ai theksoi gjithashtu se Irani synon të lidhë arritjet ushtarake me strategjinë diplomatike në zhvillim, duke sinjalizuar një qasje të kombinuar në politikën e jashtme.

Flaka