Gabimet më të zakonshme në anglisht që bëjnë përdoruesit në Google

Një analizë e re ka zbuluar se edhe disa nga fjalët më të përdorura në gjuhën angleze shpesh shkruhen gabim nga përdoruesit gjatë kërkimeve në Google. Sipas ekspertëve të Word Unscrambler, gabimet drejtshkrimore janë më të zakonshme tek fjalët që kanë rregulla të ndërlikuara, shkronja të heshtura ose kombinime jo të zakonshme.

Ndër fjalët që më shpesh shkruhen gabim përfshihen “definitely”, “separate”, “necessary”, “believe”, “through”, “business”, “tomorrow”, “beautiful”, “niece” dhe “restaurant”. Ekspertët theksojnë se shumë përdorues gabojnë në shkrimin e tyre për shkak të strukturës komplekse të gjuhës angleze dhe jo për mungesë njohurie.

Sipas tyre, mbështetja e tepruar te autocorrect mund të ndikojë në uljen e aftësive të drejtshkrimit, megjithatë gabimet konsiderohen normale dhe pjesë e vështirësive gjuhësore.

Ndërkohë, Google po sjell edhe risi të reja në shërbimin e tij Gmail. Funksioni i ri AI Overviews mundëson kërkimin e mesazheve me gjuhë natyrale dhe përmbledhjen automatike të rezultateve më të rëndësishme. Po ashtu, AI Inbox organizon automatikisht email-et në kategori dhe ndihmon në menaxhimin e detyrave, afateve dhe takimeve.

Një tjetër funksion, Proofread, kontrollon stilin, qartësinë dhe strukturën e email-eve para dërgimit, duke ofruar sugjerime për përmirësim. Disa nga këto funksione, të cilat më parë ishin të rezervuara për abonentë me pagesë, tani po bëhen të disponueshme falas për të gjithë përdoruesit e Gmail-it.

Ekspertët theksojnë se teknologjia po ndryshon mënyrën e komunikimit, duke e bërë gjuhën dhe shkrimin më të ndihmuar nga inteligjenca artificiale, por edhe më të varur nga ajo.

Flaka