Norvegjia kufizon Inteligjencën Artificiale në shkolla, ndalohet për nxënësit deri në 13 vjeç

Norvegjia ka vendosur kufizime të reja dhe të rrepta për përdorimin e Inteligjencës Artificiale (AI) në shkolla, duke u bërë një nga vendet e para që ndërmerr një hap të tillë në arsimin fillor.

Sipas vendimit të qeverisë norvegjeze, duke filluar nga fundi i muajit gusht, nxënësit e moshës 6 deri në 13 vjeç nuk do të lejohen të përdorin mjete të Inteligjencës Artificiale gjatë procesit mësimor. Ndërkohë, nxënësit nga 14 deri në 16 vjeç do të mund t’i përdorin këto teknologji vetëm nën mbikëqyrjen e drejtpërdrejtë të mësuesve.

Kryeministri norvegjez, Jonas Gahr Støre, deklaroi se përdorimi i hershëm i AI-së mund të ndikojë negativisht në zhvillimin e aftësive bazë të fëmijëve.

“Gjëja më e rëndësishme në shkollë është që fëmijët tanë të mësojnë të lexojnë, të shkruajnë dhe të bëjnë matematikë”, u shpreh ai.

Për nxënësit e moshës 17 deri në 19 vjeç, qasja do të jetë më fleksibile. Ata do të trajnohen për përdorimin e përgjegjshëm të Inteligjencës Artificiale, me synimin që të përgatiten për studimet universitare dhe tregun modern të punës.

Qeveria norvegjeze po përgatit gjithashtu ndryshime ligjore që synojnë forcimin e përdorimit të librave në klasë dhe rikthimin e fokusit te metodat tradicionale të të nxënit.

Ky vendim vjen pas ndalimit të telefonave inteligjentë në shkollat norvegjeze, një masë që sipas studimeve ka sjellë përmirësim të rezultateve akademike dhe ulje të problemeve të shëndetit mendor tek nxënësit, veçanërisht te vajzat.

Debati për rolin e Inteligjencës Artificiale në arsim po intensifikohet në mbarë botën. Ndërsa mbështetësit e saj argumentojnë se AI mund të ndihmojë në personalizimin e mësimit, kritikët paralajmërojnë se përdorimi i pakontrolluar mund të dëmtojë zhvillimin e aftësive njohëse, sociale dhe të mendimit kritik te fëmijët.

Vendimi i Norvegjisë pritet të shërbejë si shembull për vende të tjera, duke nxitur diskutime të reja mbi balancimin e teknologjisë me nevojat themelore të edukimit.

Flaka