Samsung sqaron përdorimin e të dhënave në Health pas shqetësimeve për trajnimin e AI-së

Samsung ka reaguar pas shqetësimeve të ngritura nga përdoruesit lidhur me mënyrën se si aplikacioni Samsung Health përdor të dhënat shëndetësore për zhvillimin dhe trajnimin e modeleve të inteligjencës artificiale.

Disa përdorues kishin raportuar se aplikacioni u kërkonte të jepnin pëlqim për përdorimin e të dhënave të tyre, ndërsa njoftimet fillestare krijuan paqartësi, pasi paralajmëronin se tërheqja e këtij pëlqimi mund të ndikonte në ruajtjen dhe sinkronizimin e informacionit.

Pas reagimeve, kompania koreano-jugore publikoi një sqarim brenda aplikacionit, duke theksuar se të dhënat që përdoren për zhvillimin e inteligjencës artificiale janë të ndara nga informacioni që përdoret për funksionimin e zakonshëm të Samsung Health.

Sipas Samsung, nëse përdoruesit vendosin të tërheqin pëlqimin për përdorimin e të dhënave për trajnimin e AI-së, këto të dhëna specifike do të fshihen dhe nuk do të përdoren më. Ndërkohë, të dhënat shëndetësore që lidhen me përdorimin normal të aplikacionit do të vazhdojnë të ruhen.

Kompania ka bërë të ditur gjithashtu se po punon për përmirësimin e njoftimeve dhe shpjegimeve brenda aplikacionit, në mënyrë që përdoruesit të kuptojnë më qartë se si përdoren të dhënat e tyre.

Zhvillimi vjen në një kohë kur kompanitë e mëdha teknologjike po përfshijnë gjithnjë e më shumë inteligjencën artificiale në shërbimet e tyre, duke rritur edhe diskutimet rreth privatësisë dhe kontrollit të të dhënave personale.

Flaka