Dhunoi të dashurën në banesën e tij – Prokuroria kërkon paraburgim për të dyshuarin
Prokuroria Themelore Publike në Manastir ka nisur procedurë hetimore ndaj një personi për veprën penale “Lëndim trupor”, sipas nenit 130, paragrafi 2, në lidhje me paragrafin 1 të Kodit Penal.
Sipas njoftimit të Prokurorisë, i dyshuari më 10 nëntor, në banesën e tij, ka ushtruar dhunë fizike ndaj të dashurës së tij.
Pas një mosmarrëveshjeje, ai dyshohet se ka filluar ta mbysë me duar, ndërsa më pas e ka goditur disa herë me grushte dhe shuplaka në kokë dhe trup.
Prokurori publik i ka dorëzuar Gjykatës propozim për caktimin e masës së paraburgimit ndaj të dyshuarit.
Si arsye për këtë masë, Prokuroria ka përmendur faktin se i dyshuari, pasi kishte kuptuar se ishte denoncuar në polici, ishte larguar nga stacioni policor.
Sipas prokurorit, ky veprim dëshmon rrezikun e arratisjes dhe mundësinë që i dyshuari të tentojë t’i shmanget ndjekjes penale, duke rrezikuar zhvillimin e papenguar të procedurës.
Flaka














