Shteti po planifikon pagesë elektronike të autostradave, tarifa sipas kilometrave të përshkuar
Maqedonia e Veriut po shqyrton mundësinë e kalimit në një sistem të ri elektronik të pagesës së taksave rrugore, i cili do t’i eliminonte ndalesat fizike në pikat e pagesës në autostrada. Sipas idesë së prezantuar nga zëvendëskryeministri dhe ministri i Transportit, Aleksandar Nikolloski, pagesa do të bëhej në bazë të kilometrave të përshkuar.
Nikolloski bëri të ditur se për hartimin e ligjit të ri do të kërkohet edhe ekspertizë nga jashtë, përfshirë ekspertë të Komunitetit Evropian të Transportit.
“Do të përfshijmë ekspertizën e tyre dhe në këtë mënyrë dëshirojmë ta hartojmë ligjin. Kroacia në rajon po përpiqet ta zbatojë këtë sistem, por ende nuk e ka filluar. Aktualisht nis zbatimi në unazën e Beogradit dhe kjo është pothuajse gjithçka që mund të shohim në rajon. Prandaj na nevojitet përvoja e shteteve më të avancuara evropiane”, deklaroi Nikolloski.
Ai tha se shpreson që gjatë muajit dhjetor të mund ta prezantojnë projektligjin.
Sipas ministrit, sistemi i ri do të mundësojë qarkullim më të shpejtë të automjeteve, siguri më të madhe në trafik dhe shmangien e aksidenteve që mund të shkaktohen nga ndalesat në pikat e pagesës. Gjithashtu, pagesa sipas kilometrave do të ishte më e drejtë për përdoruesit e autostradave dhe do të mund të ulte koston për disa udhëtime.
“Idetë tona janë që pagesa të bëhet sipas kilometrave të përshkuar, gjë që do të jetë shumë më e drejtë se sistemi aktual. Tani, teorikisht, nëse niseni nga Demir Kapia drejt Gjevgjelisë, paguani 100 denarë në pikën e pagesës te Smokvica. Nëse niseni nga Shkupi drejt Gjevgjelisë, në të njëjtën pikë paguani përsëri 100 denarë. Për banorët e Demir Kapisë kjo është e padrejtë. Prandaj konsiderojmë se duhet të paguhet sipas kilometrave të përshkuar, gjë që do ta ulë ndjeshëm çmimin”, tha Nikolloski.
Zbatimi fillestar i sistemit të ri parashihet në autostradën e re Kërçovë–Ohër, e cila, sipas pritjeve të ministrit, duhet të hapet plotësisht në muajin maj.
Nikolloski njoftoi se gjatë javëve të ardhshme pritet të vihet në përdorim edhe pjesa më e vështirë e kësaj autostrade, e cila përfshin katër galeri, disa ura, viadukte dhe tunelet më të gjata.
Më pas, sistemi i ri i pagesës do të mund të shtrihej edhe në autostradat e tjera që janë në ndërtim, përfshirë Prilep–Manastir, Bukojçan–Gostivar, Gostivar–Tetovë dhe Kërçovë–Bukojçan.
Për momentin bëhet fjalë për një plan në fazën e përgatitjes ligjore dhe teknike, ndërsa detajet për mënyrën konkrete të funksionimit dhe tarifat pritet të përcaktohen me ligjin e ri.














