Nëntë policë në Veles përballen me aktakuzë për mosmbrojtjen e Rosica Kocevës, e vrarë nga ish-partneri
Nëntë zyrtarë policorë, policë dhe inspektorë të Stacionit Policor në Veles, do të ulen në bankën e të akuzuarve, pasi ndaj tyre është ngritur aktakuzë për dy vepra penale: keqpërdorim të pozitës dhe autorizimit zyrtar dhe moszbatim të vendimit gjyqësor.
Ata akuzohen se nuk kanë vepruar në përputhje me masat gjyqësore për mbrojtjen e Rosica Kocevës nga dhuna në familje, para se ajo të vritej nga ish-partneri i saj, Ilija Stefanovski, më 15 shtator 2025. Në të njëjtën ngjarje u vra edhe babai i saj, Kiro Koceva, ndërsa autori më pas kreu vetëvrasje.
Sipas aktakuzës, një pjesë e policëve, pas denoncimeve të viktimës, kanë vepruar në kundërshtim me Ligjin për Policinë. Ata nuk e kanë njoftuar prokurorin publik kompetent për të marrë udhëzime të mëtejshme, ndërsa provat i kanë mbajtur në ambientet e Njësisë për Kriminalitet të Përgjithshëm pranë Departamentit të Policisë Kriminalistike në Veles, pa iniciuar asnjë procedurë.
Për veprën penale të keqpërdorimit të pozitës dhe autorizimit zyrtar, parashikohet dënim me burg prej gjashtë muaj deri në tre vjet, ndërsa për moszbatimin e vendimit gjyqësor nga një deri në pesë vjet burg.
Hetimi 13-mujor i Prokurorisë Themelore Publike për Ndjekjen e Krimit të Organizuar dhe Korrupsionit ka konstatuar se nëntë nga gjithsej 11 policët e raportuar kanë kryer vepra penale, ndërsa për dy të tjerët nuk janë siguruar prova të mjaftueshme. Kontrolli i Brendshëm i Ministrisë së Punëve të Brendshme paraprakisht kishte raportuar 11 policët, të cilët ishin ndëshkuar edhe financiarisht.
Sipas Prokurorisë, nga 21 shkurti deri më 15 shtator 2025, të akuzuarit, duke mos i përmbushur detyrat e tyre zyrtare, kanë cenuar rëndë të drejtat e Rosica Kocevës, përfshirë të drejtën kushtetuese për jetë dhe të drejtat e garantuara me nenet 2 dhe 3 të Konventës Evropiane për të Drejtat e Njeriut.
Prokuroria thekson se policët nuk kanë vepruar siç duhet ndaj denoncimeve të saj për dhunë në familje dhe nuk kanë zbatuar dispozitat ligjore dhe procedurat për vlerësimin e rrezikut dhe mbrojtjen e viktimave.
Denoncimet e shumta para vrasjes
Rasti i Rosica Kocevës ishte shoqëruar me disa denoncime ndaj ish-partnerit të saj. Në pranverën e vitit 2025, Ilija Stefanovski kishte kryer dy vepra penale ndaj saj, për kërcënim të sigurisë në kushte të dhunës në familje dhe dhunë, për të cilat ishte dënuar me kusht.
Më 18 maj 2025, Rosica kishte denoncuar në SPB Veles grafite me përmbajtje fyese dhe kërcënuese, ku përmendej me emër. Po atë ditë, automjeti i babait të saj ishte vjedhur dhe më pas djegur.
Më 21 maj, ajo kishte paraqitur kallëzim në Prokurorinë Themelore Publike në Veles për mosrespektimin e vendimit gjyqësor, pasi ish-partneri vazhdonte t’i dërgonte mesazhe dhe fotografi, pavarësisht masave mbrojtëse të shqiptuara ndaj tij.
Më 19 qershor, në derën hyrëse të një lokali tregtar ishte gjetur një USB, ku kishte fotografi dhe video me përmbajtje eksplicite të Rosicës dhe ish-partnerit të saj.
Më 15 shtator 2025, Stefanovski fillimisht vrau babanë e saj, Kiro Kocevën, ndërsa më vonë, rreth orës 15:30, në shtëpinë familjare vrau edhe Rosicën, para se t’i jepte fund jetës.
Burimi: SDK.mk
Flaka Media














