Shpërthime në Kashmir pas armëpushimit – India paralajmëron reagim të ashpër

Vetëm disa orë pas shpalljes së një armëpushimi të plotë mes Indisë dhe Pakistanit, tensionet janë rikthyer me shpërthime të fuqishme në qytetin Srinagar, në pjesën indiane të Kashmirit. Ngjarja ndodhi mbrëmjen e sotme, duke hedhur hije mbi marrëveshjen e arritur më herët gjatë ditës, shkruan Flaka

Ministri i Jashtëm i Indisë, Vikram Misri, në një deklaratë për mediat u shpreh se “ka pasur shkelje të përsëritura të marrëveshjes që kemi arritur në fillim të mbrëmjes.” Ai e cilësoi këtë si një thyerje të rëndë të besimit mes dy vendeve dhe njoftoi se forcat e armatosura indiane janë “udhëzuar të përgjigjen me forcë ndaj çdo shkeljeje përgjatë kufirit”.

Ndërkohë, në rrethin Kutch, janë raportuar edhe incidente me dronë, për të cilat politikani indian Harsh Sanghavi deklaroi se “tani do të vendoset një ndërprerje totale. Qëndroni të sigurt, mos u frikësoni.”

Shpërthimet janë konfirmuar nga kreu i qeverisë së Jammu dhe Kashmir, Omar Abdullah, i cili në një postim në platformën X shkroi: “Shpërthime po dëgjohen në të gjithë Srinagar. Situata është e paqartë.”

Pakistani ka reaguar duke hedhur poshtë çdo akuzë për shkelje të armëpushimit, ndërsa burime lokale theksojnë se shkaku i shpërthimeve mbetet ende i panjohur. CNN raportoi gjithashtu për një ndërprerje të gjerë të energjisë elektrike që pasoi shpërthimet.

Më herët gjatë ditës, presidenti i Shteteve të Bashkuara, Donald Trump, deklaroi se India dhe Pakistani kishin rënë dakord për një “armëpushim të plotë dhe të menjëhershëm” pas katër ditësh përshkallëzimi të luftimeve.

Tensionet historike mes dy fuqive bërthamore në rajon duket se po rikthehen me ritëm të shpejtë, ndërsa komuniteti ndërkombëtar i ndjek me shqetësim zhvillimet në Kashmir. Flaka Media