Gjermania shfuqizon postin e të dërguarit të posaçëm për Ballkanin Perëndimor

Qeveria e re federale në Gjermani ka vendosur të shfuqizojë disa poste të dërguarish të posaçëm, përfshirë edhe atë për Ballkanin Perëndimor, në kuadër të një reforme për thjeshtimin e strukturave shtetërore. Ky post u krijua në vitin 2022 nga ish-ministrja e Jashtme, Annalena Baerbock (Të Gjelbrit), për të intensifikuar afrimin e rajonit me Bashkimin Evropian.

Ministria e Jashtme gjermane i tha Deutsche Welle se detyrat që i përkisnin të dërguarit do të shpërndahen ndër sektorët përkatës, duke siguruar se bashkëpunimi me Ballkanin Perëndimor do të vazhdojë, ndërsa Procesi i Berlinit dhe integrimi evropian mbeten prioritete.

Manuel Sarrazin, që e mbajti këtë post, ka pasur një rol të rëndësishëm në nxitjen e dialogut rajonal dhe marrëveshjeve për mobilitet. Megjithatë, me ardhjen e qeverisë së re, rajoni përmendet shumë pak në marrëveshjen e koalicionit dhe nuk u përfshi në fjalimet e para të kancelarit Friedrich Merz apo ministrit të jashtëm Johann Wadephul.

Ky vendim ka sjellë reagime të përziera në Bundestag. Deputeti i Të Gjelbërve Boris Mijatovic e kritikoi lëvizjen si një hap pas për integrimin e rajonit, ndërsa deputeti i SPD-së, Adis Ahmetovic, theksoi se rajoni mbetet prioritet për qeverinë dhe do të trajtohet nga figura me përvojë si Wadephul dhe Krichbaum.

Në sfondin e një politike të re të jashtme më të përqendruar, mbetet për t’u parë nëse Ballkani Perëndimor do të ruajë të njëjtin nivel angazhimi nga Berlini si më parë. Flaka Media