Google Chrome çaktivizon automatikisht njoftimet e padëshiruara

Google ka bërë një hap të rëndësishëm për të përmirësuar përvojën e përdoruesve në shfletuesin Chrome, duke prezantuar një funksion të ri që çaktivizon automatikisht njoftimet nga faqet e internetit që përdoruesit nuk i marrin parasysh. Ky opsion është pjesë e Kontrollit të Sigurisë (Safety Check), i cili tashmë përdoret për të menaxhuar lejet e aksesit në kamera dhe gjurmimin e vendndodhjes.

Funksioni i ri do të revokojë lejet e njoftimeve vetëm për faqet që dërgojnë një volum të lartë njoftimesh, por që marrin shumë pak ndërveprim nga përdoruesit. Kjo nuk do të ndikojë tek aplikacionet web të instaluara (PWA), të cilat do të vazhdojnë të funksionojnë normalisht.

Sipas të dhënave të Google, më pak se 1% e njoftimeve web në Chrome marrin ndërveprim nga përdoruesit, duke i bërë ato më shpesh një burim shpërqendrimi sesa një mjet i dobishëm. Për këtë arsye, Chrome do të njoftojë përdoruesit kur një faqe të jetë çaktivizuar automatikisht dhe do t’u japë mundësinë ta rikthejnë manualisht përmes cilësimeve.

Ky funksion është i ngjashëm me një opsion ekzistues në Android, që lejon përdoruesit të çaktivizojnë njoftimet e padëshiruara me një prekje të vetme. Me këtë përditësim, Google synon të ulë lodhjen nga njoftimet (notification fatigue) dhe të krijojë një përvojë më të qetë e produktive për përdoruesit e Chrome.

Flaka