Australia ndalon fëmijët nën 16 vjeç nga rrjetet sociale – ligji hyn në fuqi më 10 dhjetor 2025

Qeveria australiane ka miratuar një nga masat më të rrepta në botë për përdorimin e mediave sociale nga të miturit. Duke filluar nga 10 dhjetori 2025, fëmijëve nën moshën 16 vjeç do t’u ndalohet të hapin ose të kenë llogari në platforma si Facebook, Instagram, TikTok, Snapchat, X dhe YouTube.

Ligji i ri detyron kompanitë e mediave sociale të marrin masa të arsyeshme për verifikimin e moshës së përdoruesve. Në rast shkeljeje, ato mund të përballen me gjoba deri në 50 milionë dollarë australianë (rreth 28 milionë euro).

Ministrja e Komunikimeve, Anika Wells, tha se qëllimi është t’u rikthehet fëmijëve një fëmijëri më e shëndetshme dhe të sigurohet që ata të zhvillojnë identitetin e tyre pa presionin e platformave digjitale. “Duam që fëmijët të kenë fëmijëri dhe prindërit të kenë qetësi shpirtërore,” u shpreh ajo.

Vendimi i Australisë po ndiqet me interes nga vende të tjera. Danimarka ka propozuar kufirin e moshës 15 vjeç dhe po shqyrton përjashtime tatimore për prindërit që ndihmojnë fëmijët e tyre të qëndrojnë larg rrjeteve sociale.

Megjithatë, mbi 140 akademikë australianë dhe ndërkombëtarë kanë kundërshtuar ligjin, duke e cilësuar si një “instrument shumë të dobët” për adresimin e rreziqeve të mediave sociale. Ata paralajmërojnë për pasoja të padëshiruara si izolimi social dhe kufizimi i qasjes në përmbajtje edukative.

Komisionerja e Sigurisë Elektronike, Julie Inman Grant, e përshkroi këtë si një “ngjarje monumentale” që do të ndikojë thellësisht tek të rinjtë, duke theksuar nevojën për një tranzicion të kujdesshëm dhe mbështetje për shëndetin mendor.

Ky ligj shihet si një eksperiment global që mund të shërbejë si model për vendet e tjera në mbrojtjen e fëmijëve në epokën digjitale.

Flaka