WhatsApp vendos kufizime për mesazhet pa përgjigje, synon mashtruesit

WhatsApp ka njoftuar se po teston një shtojcë të re sigurie që kufizon numrin e mesazheve që një llogari mund të dërgojë drejt një përdoruesi pa marrë përgjigje. Ky funksion është menduar kryesisht për të ndaluar mashtruesit dhe bizneset që dërgojnë mesazhe të padëshiruara, duke mos ndikuar në përdoruesit e zakonshëm.

Sipas raportimeve, çdo mesazh i dërguar pa përgjigje do të llogaritet në një kuotë mujore. Në momentin që marrësi përgjigjet, mesazhet e mëparshme hiqen nga kjo kuotë. WhatsApp do të shfaqë gjithashtu paralajmërime për llogaritë që i afrohen limitit, duke i ndaluar të tejkalojnë kufirin.

Meta, kompania mëmë e WhatsApp, theksoi se përdoruesit mesatarë nuk do ta arrijnë kurrë këtë prag, pasi funksioni është projektuar për të bllokuar spam-in, mesazhet promocionale të padëshiruara dhe tentativat e mashtrimit.

Ky është vetëm një nga hapat e fundit të ndërmarrë nga WhatsApp për të rritur sigurinë:

• Në vitin 2024 u mundësua anulimi i abonimit nga mesazhet promocionale.
• Në gusht 2025, WhatsApp prezantoi një njoftim të ri kur dikush jashtë kontakteve të tua të shton në një grup.
• Deri në gjysmën e parë të vitit 2025, platforma ka ndaluar mbi 6.8 milionë llogari të lidhura me qendra mashtrimi.

Ky funksion i ri pritet të testohet fillimisht në disa vende dhe më pas të shtrihet globalisht.

Flaka