“Farsë kundër UÇK-së” – Rama shpërthen nga Haga për procesin ndaj Thaçit

Kryeministri i Shqipërisë, Edi Rama, ka reaguar ashpër pas vizitës së tij te ish-presidenti i Kosovës, Hashim Thaçi, në Hagë, duke e cilësuar procesin si një “teatër turpi” dhe një padrejtësi të hapur ndaj Kosovës dhe UÇK-së.

“Sapo kam dalë nga godina ku luhet teatri i turpit të drejtësisë ndërkombëtare me Hashim Thaçin, i cili u rrëmbye pa gjyq e as akuzë nga zyra e Presidentit të Republikës”, deklaroi Rama.

Ai theksoi se Lufta Çlirimtare e Kosovës nuk mund të njolloset nga ajo që e quajti një farsë e nisur nga akuza për trafik organesh:

“Luftën Çlirimtare të Kosovës nuk e përdhos dot një farsë e nisur për trafik organesh nga kukullat ruse të Dumës së Putinit në Strasburg dhe e vazhduar me absurditete e dëshmitarë groteskë në Hagë.”

Rama tha se e ka gjetur Thaçin në gjendje të mirë morale, pavarësisht kufizimeve:

“E kam gjetur komandantin në formë, të qetë e të buzëqeshur si çdo i pafajshëm me karakter të hekurt, edhe pse me ndalime absurde të të drejtave minimale.”

Sipas tij, gjatë takimit kanë biseduar për familjen, Kosovën, Shqipërinë dhe libra që Rama i ka dhuruar Thaçit, i cili – siç tha – me ironi e quan vendin e paraburgimit “institut”.

Në fund, Rama e quajti procesin një padrejtësi të rëndë në zemër të Europës:

“Kjo është një padrejtësi ulëritëse në zemër të Europës demokratike, me bekimin e shteteve të Europës dhe SHBA-së, e me fondet e taksapaguesve europianë dhe amerikanë.”

Ai e mbylli reagimin me një mesazh politik dhe simbolik:

“Bekuar qofshin Republika e Kosovës, Ushtria Çlirimtare e Kosovës dhe të burgosurit e saj pa gjyq, prej më shumë se pesë vjetësh, në mes të Europës së lirisë, demokracisë dhe shtetit të së drejtës.” Gazeta Flaka