Shpërthim në Venezuelë? Trump zbulon operacionin ‘sekret’ të SHBA-ve
Botuar nga Flaka
Presidenti amerikan Donald Trump deklaroi se Shtetet e Bashkuara kanë kryer një sulm në një “zonë portuale”, pasi dyshohej se një anije po transportonte drogë nga Venezuela. Duke e përshkruar ngjarjen si një “shpërthim të madh”, Trump nuk dha detaje për vendndodhjen e saktë të portit apo për rrethanat konkrete të operacionit.
Deri më tani, nuk ka pasur reagim zyrtar nga qeveria e Venezuelës lidhur me deklaratat e presidentit amerikan.
Disa media të huaja raportojnë se shpërthimi mund të jetë shkaktuar nga një sulm me dron i CIA-s, por këto informacione nuk janë konfirmuar zyrtarisht. Nëse do të vërtetohej, ky do të përbënte operacionin e parë të njohur publikisht të SHBA-ve brenda territorit të Venezuelës.
Sipas autoriteteve amerikane, që nga shtatori SHBA-të kanë kryer sulme ndaj më shumë se 20 anijeve që dyshohet se janë përfshirë në trafik droge në Paqësorin lindor dhe Karaibe, ku raportohet se janë vrarë të paktën 100 persona. Sulmi i fundit u raportua të hënën, më 29 dhjetor, ndërsa Komanda Jugore e SHBA-ve njoftoi se dy persona, të cilët i cilësoi si “narko-terroristë”, u vranë në Paqësorin lindor.
Trump ka kërcënuar edhe më herët me veprime ushtarake kundër Venezuelës dhe ka autorizuar operacione sekrete të CIA-s si pjesë e një fushate presioni ndaj presidentit Nicolás Maduro. Në këtë kuadër, SHBA-të kanë vendosur rreth 15 mijë trupa, si dhe një flotë anijesh luftarake dhe aeroplanmbajtëse në Karaibe, për të frenuar trafikun e kokainës drejt territorit amerikan. Mes tyre është edhe USS Gerald Ford, aeroplanmbajtësja më e madhe në botë.
Administrata amerikane akuzon Venezuelën se përdor të ardhurat nga nafta për të financuar aktivitete kriminale të lidhura me trafikun e drogës. Presidenti venezuelian Nicolás Maduro i ka mohuar vazhdimisht këto akuza, duke deklaruar se SHBA-të e përdorin luftën kundër drogës si justifikim për të rrëzuar qeverinë e tij dhe për të vënë nën kontroll rezervat e mëdha të naftës së vendit.
Botuar nga Flaka
