Rama: Historia e shqiptarëve është mësim kundër ideologjive ç’njerëzore

Kryeministri i Shqipërisë, Edi Rama, ka ndarë një mesazh të fortë historik dhe moral, duke kujtuar rolin e shqiptarëve në mbrojtjen e hebrenjve gjatë Holokaustit, si dhe lidhjet shekullore mes dy popujve.

Duke iu referuar situatës në Gaza dhe debateve që e shoqërojnë atë, Rama theksoi se historia e shqiptarëve ofron një mësim të qartë mbi ndikimin e ideologjive dhe rëndësinë e humanizmit. Ai rikujtoi se marrëdhëniet mes shqiptarëve dhe hebrenjve datojnë prej shekujsh, që nga momentet kur refugjatët hebrenj kërkonin strehim në trojet shqiptare.

Kryeministri solli në vëmendje një nga episodet më domethënëse të Luftës së Dytë Botërore, kur autoritetet naziste dërguan përfaqësuesit e tyre për të kërkuar hebrenjtë që fshiheshin në Shqipëri. Sipas Ramës, përgjigjja e shqiptarëve ishte e prerë: “Na merrni floririn, por jo hebrenjtë”.

Ai theksoi se ky akt nuk është një legjendë, por një fakt historik i dokumentuar, që buron nga kodi moral dhe kulturor i shqiptarëve. Rama përmendi edhe shprehjen e njohur që shpjegon këtë sjellje: “Shtëpia e shqiptarit i përket Zotit dhe mikut”, duke nënvizuar se tradhtia ndaj mikut konsiderohet një nga krimet më të pafalshme në kulturën shqiptare.

Sipas tij, kjo trashëgimi morale mbetet një shembull i fuqishëm për botën edhe sot, në kohë krizash dhe konfliktesh globale.

Flaka